།དེ་འདོད་ན་སྐད་ཅིག་གཅིག་གིས་སེམས་ཅན་ཐམས་ཅད་ཀྱི་དུས་གསུམ་གྱི་འགྲོ་བའི་འཆི་འཕོ་དང་། སྐྱེ་བ་དང་སེམས་ཀྱི་སྤྱོད་པ་རབ་ཏུ་ཤེས་པར་འགྱུར་རོ། །དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་རང་གི་ལུས་སམ། སངས་རྒྱས་ཀྱི་སྐུའམ། བརྒྱ་བྱིན་གྱི་བར་རམ། ཚངས་པའི་བར་རམ། སྲེད་མེད་ཀྱི་བུའི་བར་རམ། དབང་ཕྱུག་ཆེན་པོའི་བར་རམ། རྒྱལ་ཆེན་བཞིའི་བར་རམ། འཁོར་ལོས་སྒྱུར་བའི་བར་རམ། ཆུའི་བར་རམ། མེའི་བར་རམ། སའི་བར་གྱིས་གང་བར་བྱེད་དོ། །དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་མེ་ཏོག་གི་བར་དང་། རིན་པོ་ཆེའི་ཕྲེང་བ་དང་། སྤོས་དང་། གདུགས་དང་། རྒྱལ་མཚན་དང་། བ་དན་དང་། རས་བཅོས་བུ་དང་། ཆོས་གོས་དང་། རྒྱན་རྣམ་པ་སྣ་ཚོགས་ཀྱི་བར་དག་གིས་གང་བར་བྱེད་དོ། །སུས་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་དེ་ལྟ་བུ་ཤིན་ཏུ་བསྒོམས་པ་ཡིན་ཞིང་ཤིན་ཏུ་འདྲེས་པར་བྱས་ལ་ཤིན་ཏུ་ཡིད་ལ་བྱས་པ་ཡིན་པ་དེའི་ལས་ཚད་མེད་པ་དེ་ལྟ་བུ་མ་ལུས་པར་བྱང་བར་འགྱུར་རོ། །དེ་དེ་ལྟར་བསོད་ནམས་དང་། སྟོབས་དང་། བརྩོན་འགྲུས་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། རྣམ་པར་རོལ་པ་དང་། མངོན་པར་ཤེས་པ་ཚད་མེད་པར་འགྱུར་རོ། །དེས་དེ་ལྟར་གང་ཡང་རུང་བ་དག་ཡོངས་སུ་རྫོགས་པར་བྱས་ན་མྱུར་དུ་འཁོར་བ་ལས་རྣམ་པར་ཐར་བར་འགྱུར་ཏེ། མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་རྣམས་ནི་མ་གཏོགས་སོ། །དེ་ལྟ་ཡིན་ཡང་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དེ་ཡང་བདུན་ཕྲག་བདུན་དུ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་འདི་འདིར་ཇི་ལྟར་བསྟན་པ་བཞིན་སྒོམ་པར་བྱེད་ན་བདུན་ཕྲག་བདུན་པོ་དེ་འདས་ནས་ལས་ཀྱི་སྒྲིབ་པ་སུམ་ཆ་མ་ཟད་ཅིང་ལྷག་མ་སྐྱོན་མེད་པར་མ་ལུས་པར་བྱང་བར་འགྱུར་རོ། །བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་སྒོམ་པ་དེ་ལྟ་བུ་དེ་ནི་དེ་ལྟར་དོན་ཆེ་བ་ཡིན་ནོ།