Degé Kangyur volume 55, F.203.a

།གང་གཟུགས་ལ་རང་བཞིན་གྱིས་ཆོས་ཀྱི་སྐུ་ཡིན་པས་མི་ཐུལ་བར་མངོན་དུ་ཡང་དག་པར་རྟོག་པ་དང་། ཆོས་ཉིད་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར་བརྩོན་འགྲུས་མི་འདོར་བ་དེ་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་དབྱེར་མེད་པར་རབ་ཏུ་རྣམ་པར་འབྱེད་པ་ལ་མཁས་པ་དང་། དཔྱོད་པའི་ཤེས་པ་དང་ལྷུན་གྱིས་གྲུབ་པ་རབ་ཏུ་རྣམ་པར་འབྱེད་པ་བྱ་བ་གནས་མེད་པའི་ཤེས་པའི་ཡང་དག་པར་འགྲུབ་པ་དང་། ཤིན་ཏུ་སྦྱངས་པའི་ཏིང་ངེ་འཛིན་དང་བཏང་སྙོམས་དང་ཡེ་ཤེས་ཀྱི་དགའ་བ་མྱོང་བའི་ཤེས་པ་དེ་ནི་དགའ་བ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་དམིགས་པ་ཐམས་ཅད་ཡིད་ལ་བྱེད་པའི་རྒྱུན་མི་གཅོད་པའི་ཤེས་པ་དང་། རྣམ་པར་གྲོལ་བའི་སྐྱེ་མཆེད་ཐམས་ཅད་ལ་དངོས་པོ་དང་དངོས་པོ་མེད་པ་མཉམ་པ་ཉིད་དུ་ཤེས་པ་དེ་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་རྣམ་པར་བལྟས་ནས་ཆོས་ཐམས་ཅད་མཉམ་པ་ཉིད་དུ་ཤེས་པ་དང་། བྱང་ཆུབ་ཀྱི་ཡན་ལག་སྒྲིབ་པ་མེད་པའི་རྐྱེན་དང་། ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་གཅིག་ཏུ་མངོན་པར་རྫོགས་པར་བྱང་ཆུབ་པ་དེ་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་དངོས་པོ་མེད་པའི་རང་བཞིན་མཉམ་པ་ཉིད་དུ་མངོན་དུ་ཡང་དག་པར་རྟོག་པ་དང་། གཟུགས་དང་གཟུགས་མེད་པ་ཐམས་ཅད་མཉམ་པ་ཉིད་དང་རབ་ཏུ་འཛིན་པ་དང་། རྩོད་པ་དང་རྣམ་པར་འབྱེད་པ་ལ་བཏང་སྙོམས་པ་དང་ལྷུན་གྱིས་གྲུབ་པ་དང་། འདུ་ཤེས་དང་ཡེ་ཤེས་ལ་མཉམ་པ་ཉིད་དང་ཐོབ་པའི་ཆོས་ཐམས་ཅད་མི་སྐྱེད་པ་དང་། རྒྱུ་བ་མེད་པ་དང་ཏིང་ངེ་འཛིན་དང་བཏང་སྙོམས་ཤེས་པ་དང་བྱང་ཆུབ་ཀྱི་ཡན་ལག་རྣམས་དང་། ལམ་རྣམས་སྐྱེ་བ་མེད་པའི་མཐའ་དང་ཐོབ་པ་རྣམས་མི་ཚོལ་བ་དེ་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་མཐོང་ནས་ཁམས་དང་སྐྱེ་མཆེད་རྣམས་ལ་དངོས་པོ་མེད་པའི་རང་བཞིན་དུ་མཐོང་ཞིང་ཡན་ལག་དང་ཡན་ལག་མེད་པའི་ཚུལ་གྱིས་མཉམ་པ་ཉིད་དུ་མཐོང་བ་དང་། འཕགས་པའི་ལམ་རྣམས་ལམ་མེད་པའི་ཚུལ་གྱིས་ལྟ་བ་དང་མི་འགྲོགས་པ་དང་། འཕགས་པའི་ལམ་རྣམས་དང་ལྟ་བར་གྱུར་པ་ཐམས་ཅད་མཚན་ཉིད་མེད་པར་གཅིག་པའི་ཚུལ་གྱིས་ལྟ་བ་དང་མི་འགྲོགས་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-632#UT22084-055-003-632