འཕགས་པའི་ལམ་རྣམས་དང་ལྟ་བར་གྱུར་པ་ཐམས་ཅད་མཚན་ཉིད་མེད་པར་གཅིག་པའི་ཚུལ་གྱིས་ལྟ་བ་དང་མི་འགྲོགས་པ་དང་། མི་འཁྲུགས་པའི་ཚུལ་གྱིས་ལྟ་བ་ཡང་དག་པ་ཞེས་བྱ་བ་དང་། ཆོས་ཐམས་ཅད་མཐོང་བའི་ཚུལ་གྱིས་ལྟ་བ་ཞེས་བྱ་བ་དང་། མི་སྐྱེ་བ་ཐོབ་པའི་ཚུལ་གྱིས་ལམ་ཞེས་བྱ་བའམ། མཉམ་པ་ཉིད་ཀྱི་ཚུལ་གྱིས་ཡང་དག་པ་ཞེས་བྱ་བ་དང་། སྒྲིབ་པ་མེད་པའི་ཚུལ་གྱིས་ལྟ་བ་ཞེས་བྱ་བ་དང་། ལམ་དང་ལམ་མ་ཡིན་པ་ཐམས་ཅད་ལ་འཇུག་པའི་ཚུལ་གྱིས་ལམ་ཞེས་བྱ་བ་དེ་ནི་ཡང་དག་པའི་ལྟ་བ་ཞེས་བྱའོ། །གང་གཟུགས་ལ་རྟོག་པ་དང་། རྣམ་པར་རྟོག་པ་ཐམས་ཅད་གཅིག་པ་སྟེ། འདི་ལྟ་སྟེ་དངོས་པོར་མི་རྟོག་པ་དང་དངོས་པོ་མེད་པར་མི་རྟོག་པ་དང་ཆད་པར་མི་རྟོག་པ་དང་། རྟག་པར་མི་རྟོག་པ་དང་སྐྱེ་བར་མི་རྟོག་པ་དང་མི་སྐྱེ་བར་མི་རྟོག་པ་དང་། རྟོག་པ་དང་མི་རྟོག་པ་ལ་མི་རྟོག་པ་དང་རྟོག་པ་མེད་པ་དང་རྣམ་པར་མི་རྟོག་པ་དང་། ཡང་དག་པའི་ལམ་ལ་མི་རྟོག་པ་དེ་ནི་ཡང་དག་པའི་རྟོག་པ་ཞེས་བྱའོ། །གང་གཟུགས་ལ་ཆོས་ཐམས་ཅད་བརྗོད་དུ་མེད་པ་དང་བརྗོད་པ་མེད་པ་དང་། དབྱངས་དང་དབྱངས་མེད་པ་མཉམ་པ་ཉིད་དང་མིང་མེད་པ་དང་མིང་དུ་བརྗོད་པ་མེད་པ་དང་། ཚོལ་བ་མེད་པ་དང་ལམ་གྱི་ཡན་ལག་མ་ཡིན་པ་དང་ཡང་དག་པ་ཞེས་བྱ་བ་ངག་གི་ལམ་ཐམས་ཅད་ལ་ཀུན་ཏུ་མི་རྒྱུ་ཞིང་མི་རྗོད་པ་དང་། ལམ་ཞེས་བྱ་བའི་ཆོས་མ་ལུས་པ་བརྗོད་པ་དེ་ནི་ཡང་དག་པའི་ངག་ཅེས་བྱའོ། །གང་གཟུགས་ལ་ལས་ཐམས་ཅད་ཀྱི་རང་བཞིན་ལ་ལས་མེད་པར་མངོན་པར་ཞེན་པ་འདི་ལྟ་སྟེ། མངོན་པར་འདུ་བྱ་བ་མེད་པ་ལ་མངོན་པར་ཞེན་པ་དང་མངོན་པར་འདུ་བྱ་བ་མེད་པ་ཐོབ་པ་རྣམས་ལ་ཚོལ་བ་མེད་པ་དང་ཡང་དག་པ་ཚོལ་བའམ། ལོག་པ་ཚོལ་བའམ། ལོག་པ་མ་ཡིན་པ་ཚོལ་བའམ། ལས་ཚོལ་བའམ། ལས་མ་ཡིན་པ་ཚོལ་བའམ། ལས་དང་ལས་མ་ཡིན་པ་ཐམས་ཅད་ཁས་མི་ལེན་པ་དེ་ནི་ངེས་པ་དང་མ་ངེས་པ་དང་། ཡང་དག་པ་ཉིད་དང་ལོག་པ་ཉིད་དང་དགེ་བ་དང་། མི་དགེ་བ་དང་ལུང་དུ་མི་སྟོན་པ་དང་། མི་གཡོ་བ་མངོན་པར་འདུ་མི་བྱེད་པ་དང་ལམ་དང་ལམ་མ་ཡིན་པ་མཐའ་ཡས་པ་སྐྱེ་བ་མེད་པར་བསྡུས་པ་དང་། མིག་ཡོར་ལྟ་བུའི་ཚུལ་གྱིས་ལས་ཀྱི་མཐའ་ཐམས་ཅད་མི་བྱེད་པས་ཡང་དག་པའི་ལས་ཀྱི་མཐའ་ཞེས་བྱའོ།