Degé Kangyur volume 55, F.202.b

ཉི་ཚེ་བའི་ཤེས་པས་མི་ཐུལ་བའི་ཚུལ་གྱིས་ཤེས་རབ་ཀྱི་དབང་པོ་ཞེས་བྱའོ། །​གང་གཟུགས་ལ་ཆགས་པ་མེད་ཅིང་དམིགས་པ་མེད་ལ་མི་ཐུལ་བའི་དོན་དང་། དད་པས་འཕྲོགས་པ་མེད་པའི་དོན་དེ་ནི་དད་པའི་སྟོབས་ཞེས་བྱའོ། །​གང་གཟུགས་ལ་ཀུན་ཏུ་འགྲོ་བའི་བྱིན་གྱི་རླབས་ལ་སྤྲོ་བ་དང་། སྟོབས་དང་། སྟོབས་མ་ཡིན་པའི་འདུ་ཤེས་ལས་ཤིན་ཏུ་འདའ་བ་དང་། ཁམས་ལ་དེ་ལྟར་དེ་བཞིན་གཤེགས་པའི་སྟོབས་སུ་སྒྲུབ་པ་དེ་ནི་བརྩོན་འགྲུས་ཀྱི་སྟོབས་ཞེས་བྱའོ། །​གང་གཟུགས་ལ་རྣམ་པར་མི་རྟོག་པ་དང་། རྣམ་པར་མི་སྒྲུབ་པ་དང་ལྷུན་གྱིས་གྲུབ་པའི་དྲན་པའི་ཤེས་པ་དང་། ཤིན་ཏུ་མཐར་ཐུག་པ་ལ་འཇུག་པའི་མཆོག་དང་ཡང་དག་པའི་མཐའ་དང་མཚུངས་པ་དང་དེ་བཞིན་གཤེགས་པའི་ཆོས་ཀྱི་སྐུ་ལ་དྲན་པ་ཉེ་བར་གཞོག་པ་དང་། ཉན་ཐོས་དང་རང་སངས་རྒྱས་ཐམས་ཅད་ཀྱིས་མི་ཐུལ་བའི་ཤེས་པ་དེ་ནི་དྲན་པའི་སྟོབས་ཞེས་བྱའོ། །​གང་གཟུགས་ལ་དེ་བཞིན་གཤེགས་པའི་ཡེ་ཤེས་ཀྱི་མཐར་ཐུག་པ་དང་། ཆོས་ཀྱི་དབྱིངས་ཀྱི་ལས་ཡང་དག་པར་སྒྲུབ་པ་དང་དེ་བཞིན་གཤེགས་པའི་ཏིང་ངེ་འཛིན་ལྷུན་གྱིས་གྲུབ་པའི་ཐོབ་པ་དང་། ཕྱིན་ཅི་ལོག་ཐམས་ཅད་ལ་གཡེང་བ་མེད་པ་ཤེས་པ་དེ་ནི་མི་ཐུལ་བའི་ཕྱིར་ཏིང་ངེ་འཛིན་གྱི་སྟོབས་ཞེས་བྱའོ། །​གང་གཟུགས་ལ་ཆོས་ཀྱི་དབྱིངས་འཁྲུགས་པ་མེད་པར་རྟོག་པ་དང་། མཐའ་དང་མཐའ་མ་ཡིན་པ་གཉིས་སུ་མེད་པར་རབ་ཏུ་ཤེས་པ་དང་། རྣམ་པར་གཞག་པའི་མཐའ་ལ་ལྷུན་གྱིས་གྲུབ་པའི་དྲན་པ་ཤེས་པ་དང་གནས་པ་མེད་པའི་དངོས་པོ་རབ་ཏུ་ཤེས་པ་དེ་ནི་ཤེས་རབ་ཀྱི་སྟོབས་ཞེས་བྱའོ། །​གང་གཟུགས་ལ་གནས་མེད་པའི་དྲན་པ་མངོན་དུ་ཡང་དག་པར་རྟོག་པ་དང་། དེ་བཞིན་གཤེགས་པའི་སྤྱོད་ཡུལ་དང་འཐུན་པ་དང་སྐྱེ་བ་མེད་པ་ལ་ཞུགས་པ་རྣམས་ཀྱི་དྲན་པ་ཡིད་ལ་བྱེད་པ་མེད་པའི་ཚུལ་དུ་མངོན་པར་རྫོགས་པར་བྱང་ཆུབ་པ་དེ་ནི་དྲན་པ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་ཆོས་ཀྱི་དབྱིངས་སུ་རབ་ཏུ་ཤེས་པ་དང་། མི་དམིགས་པའི་རྣལ་འབྱོར་གྱི་ཤེས་པས་རབ་ཏུ་རྣམ་པར་འབྱེད་པ་ལ་མཁས་པ་དང་། ཆོས་དང་ཆོས་མ་ཡིན་པ་གཉིས་ཁོང་དུ་ཆུད་པ་དེ་ནི་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །​གང་གཟུགས་ལ་རང་བཞིན་གྱིས་ཆོས་ཀྱི་སྐུ་ཡིན་པས་མི་ཐུལ་བར་མངོན་དུ་ཡང་དག་པར་རྟོག་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-631#UT22084-055-003-631