།ཆོས་ཐམས་ཅད་ཐོབ་པ་མེད་པའི་ཚུལ་གྱིས་གང་གཟུགས་ལ་དམིགས་པ་ཐམས་ཅད་གནས་མེད་པར་དད་པ་དང་དབང་པོ་ལ་རྟོག་པ་དང་གཟུགས་དང་གཟུགས་མེད་པ་མཉམ་པ་ཉིད་དུ་གྱུར་པའི་ཆོས་རྣམས་ལ་དད་པ་དང་། དབང་པོ་ཞུམ་པ་མེད་པས་དེ་བཞིན་གཤེགས་པའི་ཡེ་ཤེས་ལ་དད་པ་དེ་ནི་དད་པའི་དབང་པོ་ཞེས་བྱའོ། །གདེག་པ་མེད་པ་དང་གཞག་པ་མེད་པའི་ཚུལ་གྱིས་གང་གཟུགས་ལ་དམིགས་པ་ཐམས་ཅད་མགོ་གཅིག་ཏུ་གྱུར་པ་དང་། རྣལ་འབྱོར་གྱི་རྒྱུན་མི་གཅོད་པ་དེ་ནི་བརྩོན་འགྲུས་ཞེས་བྱ་སྟེ། མི་དམིགས་པའི་ཚུལ་གྱིས་དེ་བཞིན་གཤེགས་པའི་ཡེ་ཤེས་རྒྱུན་མི་གཅོད་པ་དེ་ནི་བརྩོན་འགྲུས་ཀྱི་དབང་པོ་ཞེས་བྱའོ། །དེ་བཞིན་གཤེགས་པའི་གནས་ལ་དབང་པོ་འཇུག་པའི་ཚུལ་གྱིས་གང་གཟུགས་ལ་དྲན་པ་མེད་ཅིང་ཡིད་ལ་བྱེད་པ་མེད་པའི་ཚུལ་གྱིས་དམིགས་པ་ལས་ཤིན་ཏུ་འདས་ནས་གཅིག་དྲན་ཏེ། དུས་གསུམ་མཚན་ཉིད་གཅིག་ཏུ་དྲན་པ་དེ་ནི་དྲན་པ་ཞེས་བྱ་སྟེ། སེམས་ཅན་ཐམས་ཅད་ཀྱི་སེམས་སེམས་སུ་མཚུངས་པས། དམིགས་པ་གཅིག་གིས་སེམས་ཅན་གྱི་ཁམས་ཐམས་ཅད་ཁྱབ་པ་དང་། དེ་བཞིན་གཤེགས་པ་མཐོང་བའི་བྱིན་གྱི་རླབས་དེ་ནི་དྲན་པའི་དབང་པོ་ཞེས་བྱའོ། །སྐྱེ་བ་མེད་པ་དང་འགག་པ་མེད་པ་དང་གཡེང་བ་མེད་པའི་ཚུལ་གྱིས་གང་གཟུགས་ལ་ཡིད་ལ་བྱེད་པ་ཐམས་ཅད་གཅིག་པ་དང་། གཟུགས་དང་གཟུགས་མེད་པའི་ཏིང་ངེ་འཛིན་དམིགས་པ་གཅིག་པ་དང་མཚན་ཉིད་ཐམས་ཅད་མཚན་ཉིད་གཅིག་སྟེ། གཡེང་བ་མེད་པ་དང་དེ་བཞིན་གཤེགས་པའི་དབང་པོ་ལ་འཇུག་པའི་ཡེ་ཤེས་དང་། རྡོ་རྗེ་ལྟ་བུའི་ཏིང་ངེ་འཛིན་ཐུན་མོང་མ་ཡིན་པ་དེ་ནི་ཏིང་ངེ་འཛིན་ཅེས་བྱ་སྟེ། ཏིང་ངེ་འཛིན་ཐམས་ཅད་སྐྱེ་བ་མེད་པའི་ཚུལ་དང་། གཡེང་བ་མེད་ཅིང་མི་ཐུལ་བས་ཏིང་ངེ་འཛིན་གྱི་དབང་པོ་ཞེས་བྱའོ། །གང་གཟུགས་ལ་གནས་མེད་པའི་ཤེས་རབ་དང་ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་དང་། སྐྱེ་བ་མེད་པའི་མཐར་ཡང་དག་པར་འདུས་པའི་སྤྱོད་པ་དང་། ཆོས་ཐམས་ཅད་སྐྱེ་བ་མེད་པ་ལ་འཇུག་པའི་ཤེས་རབ་ཀྱིས་འདུས་བྱས་དང་འདུས་མ་བྱས་གཉིས་ལས་ཤིན་ཏུ་འདའ་བ་དང་། གཉེན་པོ་མེད་པའི་ཚུལ་གྱིས་གཟུགས་དེ་ལ་གང་མཚན་ཉིད་གཅིག་ཏུ་འཇུག་པ་དེ་ནི་ཤེས་རབ་ཅེས་བྱ་སྟེ། ཉི་ཚེ་བའི་ཤེས་པས་མི་ཐུལ་བའི་ཚུལ་གྱིས་ཤེས་རབ་ཀྱི་དབང་པོ་ཞེས་བྱའོ།