Degé Kangyur volume 55, F.187.a

ཡིད་ལ་བྱེད་པ་ཡང་དག་པར་གཅོད་པ། ཕུང་པོ་དང་ཁམས་དང་སྐྱེ་མཆེད་ཀྱི་རང་བཞིན་ཤེས་པ། དྲན་པ་དང་བློ་གྲོས་དང་མོས་པ་དང་རྟོག་པ་དང་། ངོ་ཚ་ཤེས་པ་དང་སྤྱོད་པ་དང་ཆོ་ག་དང་། སྤྱོད་ཡུལ་ལ་ནན་ཏན་དུ་བྱེད་ཅིང་གནས་པ། ཉོན་མོངས་པ་མེད་པའི་ས་དང་ལྡན་པ། ཞི་བའི་ས་དང་ལྡན་པ། སྤྲོས་པ་ཐམས་ཅད་ཡང་དག་པར་གཅོད་པ། བྱང་ཆུབ་སེམས་དཔའི་བསླབ་པ་ཐམས་ཅད་དང་དེ་བཞིན་གཤེགས་པའི་སྤྱོད་ཡུལ་ཐམས་ཅད་དང་། ཡོན་ཏན་ཐམས་ཅད་ཡོངས་སུ་འགྲུབ་པ་འདི་ནི་བཟང་སྐྱོང་ཏིང་ངེ་འཛིན་འདིའི་ཡོངས་སུ་སྦྱང་བ་བྱའོ། །​བཟང་སྐྱོང་བྱང་ཆུབ་སེམས་དཔའ་ནི་ཆོས་ལ་སེམས་ཤིང་ཆོས་དཔྱོད་པ་ཡིན་ཏེ། དེས་ནི་དེ་བཞིན་གཤེགས་པ་ཆོས་ཀྱི་སྐུར་ཡང་ཡང་དག་པར་རྗེས་སུ་མི་མཐོང་ན་ཆོས་ཀྱི་སྐུ་ལས་གཞན་དུའང་དམིགས་པ་ལྟ་ཅི་སྨོས། བཟང་སྐྱོང་འདི་ལ་བྱང་ཆུབ་སེམས་དཔས་འདི་ལྟར་སོ་སོར་བརྟག་པར་བྱ་སྟེ། དེ་བཞིན་གཤེགས་པ་ཞེས་བྱ་བའི་ཚིག་འདིའི་དོན་ཇི་ལྟ་བུ། ཅི་གཟུགས་དེ་བཞིན་གཤེགས་པ་ཡིན་ནམ། འོན་ཏེ་གཟུགས་ལས་གཞན་ཞིག་དེ་བཞིན་གཤེགས་པ་ཡིན་སྙམ་དུ་དེ་ལྟར་དཔྱོད་པ་ལ་མཁས་པར་བྱའོ། །​དེ་འདི་ལྟར་སོ་སོར་རྟོག་སྟེ། གཟུགས་ཀྱང་དེ་བཞིན་གཤེགས་པ་མ་ཡིན་ལ། གཟུགས་ལས་གཞན་པ་ཡང་མ་ཡིན་ནོ། །​དེ་ཅིའི་ཕྱིར་ཞེ་ན། གཟུགས་ནི་བེམས་པོ་གཡོ་བ་མེད་པ། དཔྱོད་པ་མེད་པ། རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་བུར་ངན་པ། དབུ་བ་རྡོས་པ་ལྟ་བུ་ཡིན་ཞིང་། འབྱུང་བ་ཆེན་པོ་བཞི་ཕན་ཚུན་ནས་བསྡུས་པ་ནི་གཟུགས་ཞེས་བྱའོ། །​གཟུགས་ནི་རྟེན་ཅིང་འབྲེལ་པ་ལས་འབྱུང་ངོ་། །​གང་རྟེན་ཅིང་འབྲེལ་པར་འབྱུང་བ་དེ་མི་རྟག་པའོ། །​གང་མི་རྟག་པ་དེ་སྡུག་བསྔལ་བའོ། །​གང་སྡུག་བསྔལ་བ་དེ་བདག་མེད་པའོ། །​གང་བདག་མེད་པ་དེ་རང་བཞིན་མེད་པའོ། །​གང་རང་བཞིན་མེད་པ་དེ་སྣང་བ་མེད་པའོ། །​གང་སྣང་བ་མེད་པ་དེ་ཡང་དག་པ་མ་ཡིན་པའོ། །​གང་ཡང་དག་པ་མ་ཡིན་པ་དེ་བརྫུན་པ་སླུ་བའི་ཆོས་སོ། །​གང་བརྫུན་པ་སླུ་བའི་ཆོས་དེ་མི་བདེན་པའོ། །​གང་མི་བདེན་པ་དེ་དེ་བཞིན་ཉིད་མ་ཡིན་ནོ། །



The English translation of this folio by 84000 Translating the words of the Buddha can be found at:
https://read.84000.co/translation/toh129.html?part=UT22084-055-003-600#UT22084-055-003-600