Degé Kangyur volume 55, F.187.b

གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །​དེ་བཞིན་གཤེགས་པ་ནི་བདེན་པ། ཡང་དག་པ། དེ་བཞིན་ཉིད་མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད། མ་ལོག་པ་བདེན་པ་སྨྲ་བ། ཡང་དག་པ་སྨྲ་བ། ཤེས་པ་སྨྲ་བ། ཡེ་ཤེས་ཀྱི་མཚོན་ཆ་ཅན། ཡེ་ཤེས་མཐའ་ཡས་པ་དང་ལྡན་པ། ཐམས་ཅད་མཁྱེན་པ། ཐམས་ཅད་གཟིགས་པ། སྟོབས་བཅུ་དང་ལྡན་པ། མི་འཇིགས་པ་བཞི་དམ་པའི་ཕ་རོལ་ཏུ་ཕྱིན་པ་ཐོབ་པ། མི་རྟོག་པ་རྣམ་པར་མི་རྟོག་པ། མི་གོས་པ། ནམ་མཁའ་དང་མཚུངས་པ། གྲངས་ཀྱི་ཆོས་རྣམས་ཀྱིས་མི་འགྲངས་པ། མ་བྱས་པ། མ་སྐྱེས་པ། མ་འགགས་པ། འཇུག་པ་མེད་པ། མཐའ་ཡས་པ། གནས་མེད་པ། རྣམ་པར་མི་རིག་པ། རྣམ་པར་ཤེས་པར་བྱ་བ་མ་ཡིན་པ། ཀུན་ཏུ་རྒྱུ་བ་མེད་པ། ཤིན་ཏུ་དག་པ། ཉོན་མོངས་པ་མེད་པ། མ་བྱུང་བ། སྤྱོད་པ་མེད་པ། གནས་མེད་པའོ་སྙམ་མོ། །​དེ་འདི་ལྟར་སོ་སོར་རྟོག་སྟེ། གཟུགས་དེ་བཞིན་གཤེགས་པ་མ་ཡིན། གཟུགས་ལས་གཞན་པ་ཡང་མ་ཡིན་ནོ། །​དེ་ཅིའི་ཕྱིར་ཞེ་ན། གལ་ཏེ་གཟུགས་ལས་གཞན་པ་ཞིག་དེ་བཞིན་གཤེགས་པ་ཡིན་ན་ནི་ནམ་མཁའ་ཡང་དེ་བཞིན་གཤེགས་པར་འགྱུར་རོ། །​དེ་ཅིའི་ཕྱིར་ཞེ་ན། ནམ་མཁའ་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྣམ་པར་མི་རིག་པ། གནས་པ་མེད་པ། གཟུང་དུ་མེད་པ། གནས་མེད་པ། མཚན་ཉིད་མེད་པའོ་སྙམ་མོ། །​དེ་འདི་ལྟར་སོ་སོར་རྟོག་སྟེ། གལ་ཏེ་གཟུགས་དེ་བཞིན་གཤེགས་པ་མ་ཡིན། གཟུགས་ལས་གཞན་པ་ཡང་མ་ཡིན་ན། ཅི་ཚོར་བ་དེ་བཞིན་གཤེགས་པར་འགྱུར་རམ། འོན་ཏེ་ཚོར་བ་ལས་གཞན་པ་ཞིག་སྙམ་མོ། །​དེ་འདི་ལྟར་སོ་སོར་རྟོག་སྟེ། ཚོར་བ་དེ་བཞིན་གཤེགས་པ་མ་ཡིན། ཚོར་བ་ལས་གཞན་པ་ཡང་མ་ཡིན་ནོ། །​དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་གང་ཅི་ཚོར་ཡང་རུང་སྟེ་དེ་ཐམས་ཅད་སྡུག་བསྔལ་བའོ། །​གང་སྡུག་བསྔལ་བ་དེ་རྟོག་པའི་མཚན་ཉིད་དོ། །​རྟོག་པའི་མཚན་ཉིད་གང་ཡིན་པ་དེ་དེ་བཞིན་གཤེགས་པ་མ་ཡིན། ཚོར་བ་ནི་ཆུའི་ཆུ་བུར་ལྟ་བུའོ། །​ངན་པའོ། །​རྟེན་ཅིང་འབྲེལ་པར་འབྱུང་བའོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-601#UT22084-055-003-601