འཇིག་རྟེན་འགོག་པར་འགྱུར་བའི་ལམ་ཡང་རིག་པར་བྱའོ། །མཽད་གལ་གྱི་བུ་ངས་གཞན་ཡང་འཇིག་རྟེན་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་ཏེ། སྦྱིན་པའི་ཕ་རོལ་ཏུ་ཕྱིན་པ་དང་ཡང་དག་པར་ལྡན་པར་བྱས། ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཡང་དག་པར་ལྡན་པར་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་ཅིང་གྲངས་མེད། བསམ་གྱིས་མི་ཁྱབ་གཞལ་དུ་མེད་གཞལ་གྱིས་མི་ལང་བརྗོད་དུ་མེད་པའི་འཁོར་བ་དེའི་ཕ་རོལ་གྱི་ཡང་ཆེས་ཕ་རོལ་ན་དེད་དཔོན་སྙིང་རྗེ་ཅན་ཞེས་བྱ་བ་མཛངས་ཤིང་གསལ་ལ་ཡིད་གཞུངས་པ། ཕྱོགས་ལ་མཁས་པ་དང་། ཕྱོགས་མཚམས་ལ་མཁས་པ་དང་། དོན་ལ་མཁས་པ་དང་། དོན་མ་ཡིན་པ་ལ་མཁས་པ་དང་། རྒྱུ་སྐར་ལ་མཁས་པ་དང་། ཉིན་མོ་ལ་མཁས་པ་དང་། ཐང་ཅིག་ལ་མཁས་པ་དང་། སྐད་ཅིག་ལ་མཁས་པ་དང་། ཡུད་ཙམ་ལ་མཁས་པ་དང་། ཐབས་ལ་མཁས་པ་དང་། ངན་སོང་ལ་མཁས་པ་ཞིག་བྱུང་ངོ་། །དེ་ངེས་པར་བྱས་པ་ཡིན་ཏེ། དགེ་མཚན་དང་བཀྲ་ཤིས་བྱས་ནས་ཚོང་པ་ལྔ་བརྒྱ་དང་ལྷན་ཅིག་ཏུ་རྒྱ་མཚོ་ཆེན་པོར་ཞུགས་སོ། །དེར་ཚོང་པའི་དེད་དཔོན་འདྲེན་པ་དེས་ཚོང་པ་དེ་དག་ལ་འཇིག་རྟེན་གྱི་གཏམ་སྨྲའོ། །འཇིག་རྟེན་འདིའི་ཤར་ཕྱོགས་ཀྱི་འཇིག་རྟེན་གྱི་ཁམས་དཔག་ཏུ་མེད་པ་ན་གཞན་ནི་སྐྱེ། གཞན་ནི་འགག །གཞན་ནི་འཇིག །གཞན་ནི་འབྱུང་། གཞན་ནི་ཞིག་ནས་གནས། གཞན་ནི་བྱུང་ནས་གནས། གཞན་ནི་བྱུང་སྟེ་གྲོགས་པོ་དག་འཇིག་རྟེན་གྱི་ཁམས་དེ་དག་ནི་མཐའ་མེད་དོ། །དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་དེ་དག་ན་སེམས་ཅན་རིགས་ཕུན་སུམ་ཚོགས་པ་ཡོད། སེམས་ཅན་རིགས་དམའ་བ་ཡོད་སེམས་ཅན་ཁ་ཅིག་ནི་ཕྱུག །ཁ་ཅིག་ནི་དབུལ། སེམས་ཅན་ཁ་ཅིག་ནི་བྲན་ཡིན། ཁ་ཅིག་ནི་རྗེ་བོ་ཡིན་ཏེ། དེ་ལྟར་སྤྱི་ཤེས་པ་དང་། ཁྱད་པར་ཤེས་པ་རྣམ་པ་དུ་མ་འདི་ནི་འཇིག་རྟེན་ཤེས་པ་ཞེས་བྱའོ། །གྲོགས་པོ་དག་དེ་ལྟ་བས་ན་འཇིག་རྟེན་དང་འཇིག་རྟེན་གྱི་ཤེས་པ་ལ་འབད་པར་བྱའོ། །མཽད་གལ་གྱི་བུ་དེ་ཇི་སྙམ་དུ་སེམས།