།མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དེད་དཔོན་སྙིང་རྗེ་ཅན་ཞེས་བྱ་བ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དེད་དཔོན་སྙིང་རྗེ་ཅན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འཇིག་རྟེན་དང་འཇིག་རྟེན་གྱི་སྤྱོད་པ་ལ་རྣལ་འབྱོར་དུ་བྱའོ། །མཽད་གལ་གྱི་བུ་ངས་གཞན་ཡང་འཇིག་རྟེན་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་ཏེ། མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་སྐྱེ་བོ་ཐམས་ཅད་ཀྱི་བསམ་པའི་རྗེས་སུ་འཇུག་པ་ཞེས་བྱ་བ་གཟུགས་ཀྱིས་འཚོ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བྱུང་ངོ་། །དེས་སྐྱེས་བུ་གང་དང་གང་དུ་འགྲོ་བར་འགྱུར་བ་དེ་དང་དེར་ཐམས་ཅད་ཀྱི་བསམ་པའི་རྗེས་སུ་འཇུག་སྟེ། བདག་གི་ངོ་བོ་ཉིད་ནི་མི་སྟོན་ཅིང་གར་ཡང་རྗེས་སུ་མི་གཏོང་ངོ་། །མཽད་གལ་གྱི་བུ་དེ་བཞིན་དུ་འདུ་བྱེད་ཐམས་ཅད་ཇི་ལྟ་ཇི་ལྟར་སོ་སོར་བརྟགས་ན། དངོས་པོ་མེད་པར་མཐོང་སྟེ། འདུ་བྱེད་རྣམས་གང་ཡང་ངེས་པ་མེད་དོ། །གལ་ཏེ་གཙང་བར་རྟོག་ན་གཙང་བའི་ཁ་དོག་ཏུ་སྟོན་ལ། གལ་ཏེ་མི་གཙང་བར་རྟོག་ན་མི་གཙང་བའི་ཁ་དོག་ཏུ་སྟོན་ཏོ། །དེ་བཞིན་དུ་སྦྱར་ཏེ། གལ་ཏེ་བདེ་བའམ། གལ་ཏེ་སྡུག་བསྔལ་བའམ། གལ་ཏེ་རྟག་པའམ། གལ་ཏེ་མི་རྟག་པའམ། གལ་ཏེ་མཚན་མའམ། གལ་ཏེ་མཚན་མ་མེད་པར་རྟོག་ན་དེའི་ཁ་དོག་ཏུ་སྟོན་པར་བྱེད་དོ། །མཽད་གལ་གྱི་བུ་དེ་ལ་གཙང་བར་རྟོག་པ་ནི་འཆིང་ལ། མི་གཙང་བར་རྟོག་པ་ནི་ཐར་པའོ། །བདེ་བར་རྟོག་པ་ནི་འཆིང་ལ། སྡུག་བསྔལ་དུ་རྟོག་པ་ནི་ཐར་པའོ། །དེ་བཞིན་དུ་སྦྱར་ཏེ། རྟག་པ་ནི་འཆིང་ལ་མི་རྟག་པ་ནི་ཐར་པའོ། །བདག་ནི་འཆིང་ལ་བདག་མེད་པ་ནི་ཐར་པའོ། མཚན་མར་རྟོག་པ་ནི་འཆིང་ལ། མཚན་མེད་པ་རྟོག་པ་ནི་ཐར་པའོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་ངན་ལས་འདའ་བར་འདོད་པ་དང་། སེམས་ཅན་རྣམས་ཀྱང་ཡོངས་སུ་མྱ་ངན་ལས་བཟླ་བར་འདོད་པས།