འཆི་བས་འཇིག་རབ་ཏུ་འཇིག་རྣམ་པར་རབ་ཏུ་འཇིག་ཤིག་ཤིག་པོར་འགྱུར། ལྷོད་ལྷོད་པོར་འགྱུར། རྙིངས་པར་འགྱུར། ཁ་དོག་ངན་པར་འགྱུར་རོ། །ཡོངས་སུ་ཤེས་པ་གང་གིས་འཇིག་རྟེན་འདི་ཉིད་དེ་ལྟར་ཤེས་ན། རྒ་བའི་སྡུག་བསྔལ་དག་འགག་པར་འགྱུར། ན་བའི་སྡུག་བསྔལ་དག་འགག་པར་འགྱུར། འཆི་བའི་སྡུག་བསྔལ་དག་འགག་པར་འགྱུར་རོ་སྙམ་མོ། །དེ་འདི་སྙམ་དུ་སེམས་ཏེ། སེམས་ཅན་འདི་དག་ཐམས་ཅད་ནི་འཇིག་རྟེན་གནས་པ་ཐམས་ཅད་འཇིག་པའི་ཆོས་དང་རབ་ཏུ་འཇིག་པའི་ཆོས་སུ་སེམས་ཅན་དེ་དག་གིས་རབ་ཏུ་མི་ཤེས་སོ་སྙམ་ནས། དེ་སེམས་ཅན་འདི་དག་ཉིད་ལས་སྙིང་རྗེ་ཆེན་པོ་ཐོབ་སྟེ། བདག་གིས་སེམས་ཅན་འདི་དག་འཇིག་རྟེན་ལས་ཡོངས་སུ་ཐར་བར་བྱའོ་སྙམ་མོ། །དེ་འདི་ཉིད་ལ་བརྩོན་པས་མངོན་པར་ཤེས་པ་ལྔ་ཐོབ་སྟེ། དེ་རང་གི་མངོན་པར་ཤེས་པ་ལྔ་པོ་དེ་དག་གིས་རྩེའོ། །མངོན་པར་ཤེས་པ་ལྔ་པོ་དག་སེམས་ཅན་རྣམས་ལ་ཡང་དག་པར་རབ་ཏུ་སྟོན་ཏོ། །མངོན་པར་ཤེས་པ་ལྔ་དང་ལྡན་པས་སེམས་ཅན་དག་འགྲོ་བ་ལྔར་རྣམ་པར་རྒྱུག་པ་མཐོང་ངོ་། །དེས་ན་སྙིང་རྗེ་ཆེན་པོ་བསྐྱེད་ནས་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ཐམས་ཅད་མངོན་པར་ཤེས་པ་ལྔ་ལ་རབ་ཏུ་བཀོད་དོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་ཡོངས་སུ་རྒྱུ་བ་པ་འཆར་ཀ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་ཡོངས་སུ་རྒྱུ་བ་པ་འཆར་ཀ་ཞེས་བྱ་བར་གྱུར་ཏོ། །ངས་གང་གིས་སངས་རྒྱས་ཀྱི་ཞིང་ཐམས་ཅད་དང་ལྡན་པའི་སེམས་ཅན་དེ་དག་མངོན་པར་ཤེས་པ་ལྔ་ལ་བཀོད་དོ། །སེམས་ཅན་དེ་དག་ཐམས་ཅད་ཀྱི་མངོན་པར་ཤེས་པ་ལྔ་པོ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་སོ། །སེམས་ཅན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་སེམས་ཅན་རྣམས་ཀྱི་དོན་བྱས་ནས་ཡོངས་སུ་མྱ་ངན་ལས་བཟླས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འཇིག་རྟེན་བདག་གི་ལུས་འདོམ་གང་ཙམ་པ་འདི་ཉིད་རིག་པར་བྱ། འཇིག་རྟེན་ཀུན་འབྱུང་བ་དང་། འཇིག་རྟེན་འགོག་པ་དང་། འཇིག་རྟེན་འགོག་པར་འགྱུར་བའི་ལམ་ཡང་རིག་པར་བྱའོ།