Degé Kangyur volume 46, F.219.b

བུ་མོས་སྨྲས་པ། འཇམ་དཔལ་དེ་ནི་མ་མཆིས་སོ། །​འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མེད་དེ། སྲིང་མོ་དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །​བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །​སྲིང་མོ་འདི་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་པའམ། རྣམ་པར་ཤེས་པ་ཡོད་དམ། བུ་མོས་སྨྲས་པ། འཇམ་དཔལ་དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མི་སེམས་སོ། །​སྲིང་མོ་དེའི་ཕྱིར་རྣམ་པར་ཤེས་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །​བྱང་ཆུབ་མཉམ་པ་ཉིད་ཀྱིས་རྣམ་པར་ཤེས་པ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །​སྲིང་མོ་གཞན་ཡང་གཟུགས་ནང་ངམ། ཕྱི་རོལ་ལམ། གཉི་ག་མེད་པར་རམ། གཟུགས་འདི་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་། དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་ནུས་སམ། བུ་མོས་སྨྲས་པ། འཇམ་དཔལ་དེ་ནི་མ་ལགས་སོ། །​འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་ནང་ངམ། ཕྱི་རོལ་ལམ། གཉི་ག་མེད་པར་རམ། བྱང་ཆུབ་དེ་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་མི་ནུས་ཏེ། སྲིང་མོ་དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །​བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །​སྲིང་མོ་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནང་ངམ། ཕྱི་རོལ་ལམ། གཉི་ག་མེད་པར་རམ། རྣམ་པར་ཤེས་པ་འདི་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ།



The English translation of this folio by 84000 - Translating the words of the Buddha can be found at:
https://read.84000.co/translation/toh96.html?part=UT22084-046-002-586#UT22084-046-002-586