Degé Kangyur volume 46, F.217.a

༄༅༅། །​རྒྱ་གར་སྐད་དུ། ཨཱརྱ་མཉྫུ་ཤྲཱི་བི་ཀྲཱི་ཌི་ཏ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འཇམ་དཔལ་རྣམ་པར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བརྒྱ་སྟོང་དང་ཐབས་ཅིག་ཏུ་བཞུགས་ཏེ། དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་སྨད་འཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་འདུག་སྟེ། བུ་མོ་དེ་ཡང་སྔོན་གྱི་དགེ་བའི་རྩ་བའི་རྒྱུས་ལུས་ཀྱི་མདོག་གསེར་གྱི་ཁ་དོག་ལྟ་བུར་མངོན་པར་གྲུབ་པར་གྱུར་ཅིང་། སའི་ཕྱོགས་གང་དུ་འགྲེང་བ་དང་། འདུག་པ་དང་། འགྲོ་བའི་ས་ཕྱོགས་དེ་དག་ཀྱང་གསེར་གྱི་ཁ་དོག་ལྟ་བུའི་འོད་ཀྱིས་སྣང་བར་གྱུར་ཏེ། དེས་གོས་དམར་པོའམ། དཀར་པོའམ། གང་དག་གྱོན་པར་གྱུར་པའི་གོས་དེ་དག་ཐམས་ཅད་ཀྱང་གསེར་གྱི་ཁ་དོག་ལྟ་བུ་ཉིད་དུ་ཀུན་དུ་སྣང་ངོ་། །​བུ་མོ་དེ་ཡང་སྐྱེ་བོའི་ཚོགས་ཐམས་ཅད་ལ་དགའ་ཞིང་ཡིད་གཅུགས་པ་དང་། ལྟ་བས་མི་ངོམས་ཤིང་བཀའ་བློ་བདེ་ལ་དེས་པ་དང་། འཇམ་པ་དང་། སྙན་པ་དང་། དགའ་བ་སྨྲ་ཞིང་བཞིན་འཛུམ་པ་དང་། ཤིན་ཏུ་འཐུན་པར་འཛིན་པ་དང་། ཁྲོ་གཉེར་མེད་པ་དང་། མི་རྩུབ་པ་དང་། མི་བརླང་བར་གྱུར་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དེ་ན་རྒྱལ་བུ་གཞོན་ནུ་རྣམས་དང་། བློན་པོའི་བུ་གཞོན་ནུ་རྣམས་དང་། ཚོང་དཔོན་གྱི་བུ་གཞོན་ནུ་རྣམས་དང་། ཁྱིམ་བདག་གི་བུ་གང་ཇི་སྙེད་པ་དེ་དག་ཀྱང་དེ་ལ་ཤིན་ཏུ་ཆགས་ཤིང་ཡིད་འབྲང་བར་གྱུར་ཏེ་ལྟ་བས་ཆོག་མི་ཤེས་སོ། །​སྨད་འཚོང་མའི་བུ་མོ་གསེར་མཆོག་འོད་དཔལ་དེ་སྐྱེད་མོས་ཚལ་ལམ། འབབ་ཆུའམ། རྫིང་བུའམ། ཁྱིམ་འམ། ལམ་པོ་ཆེའམ། གྲོང་བར་རམ། གང་དང་གང་དུ་འགྲོ་བ་དེ་དང་དེ་དག་ཏུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་མང་པོ་རྣམས་ཀྱང་ཤིན་ཏུ་ལྟད་མོར་གྱུར་ནས་ཀུན་འདུས་ཏེ་



The English translation of this folio by 84000 Translating the words of the Buddha can be found at:
https://read.84000.co/translation/toh96.html?part=UT22084-046-002-581#UT22084-046-002-581