Degé Kangyur volume 46, F.239.b

།རང་གི་སེམས་ལ་གཏི་མུག་མེད་པས་སེམས་ཅན་ཐམས་ཅད་ཀྱི་སེམས་ལ་གཏི་མུག་མེད་དོ། །​རང་གི་སེམས་ལ་ཉོན་མོངས་པ་མེད་པས་སེམས་ཅན་ཐམས་ཅད་ཀྱི་སེམས་ལ་ཉོན་མོངས་པ་མེད་དོ། །​དེ་ལྟར་རྟོགས་པ་གང་ཡིན་པ་དེ་ཐམས་ཅད་མཁྱེན་པའི་ཡེ་ཤེས་རྟོགས་པ་ཡིན་ནོ། ཁྱེའུ་དེ་ལྟར་ཚུལ་བཞིན་ལ་བརྩོན་པའི་བྱང་ཆུབ་སེམས་དཔས་ནི་སེམས་ཅན་ཐམས་ཅད་ཀྱི་སེམས་ལ་རང་བཞིན་གྱིས་ཀུན་ནས་ཉོན་མོངས་པ་མེད་པར་རབ་ཏུ་ཤེས་སོ། །​གང་གློ་བུར་གྱི་ཉོན་མོངས་པས་ཉེ་བར་ཉོན་མོངས་ཀྱང་སེམས་ཀྱི་རྒྱུད་ལ་ནི་ཉོན་མོངས་པར་འགྱུར་བ་ཡང་མེད་ལ། ཆོས་ཀྱི་རིགས་པའི་ལྷག་མཐོང་གིས་དེ་དག་དེ་ལ་ཡོངས་སུ་གདུང་བ་ཡང་མེད་དེ། དེས་བྱང་ཆུབ་སེམས་དཔའ་དེ་དག་གིས་གློ་བུར་གྱི་ཉོན་མོངས་པ་རྣམས་མཐོང་བས་ན་ཀུན་ནས་ཉོན་མོངས་པར་མི་འགྱུར་རོ། །​བསྟན་པ་འདི་བཤད་པ་ན་ཚོང་དཔོན་གྱི་བུ་འཇིགས་བྱིན་ཆོས་རྣམས་ལ་རྗེས་སུ་འཐུན་པའི་བཟོད་པ་སྐྱེས་པར་གྱུར་ཏོ། །​དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས། ཚོང་དཔོན་གྱི་བུ་དེ་དུལ་བར་རིག་ནས། ལྷའི་བུ་མོ་ལྔ་བརྒྱ་ཙམ་གྱིས་ཡོངས་སུ་བསྐོར་ཏེ། སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་པ་དག་བྱེད་ཅིང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་གོ། །​དེ་ནས་འཇམ་དཔལ་གཞོན་ནུར་གྱུར་པས་ཚོང་དཔོན་གྱི་བུ་འཇིགས་བྱིན་ལ་འདི་སྐད་ཅེས་སྨྲས་སོ། །​ཁྱེའུ་ཁྱོད་ཀྱིས་སྲིང་མོ་འདི་ཤེས་སམ། སྨྲས་པ། འཇམ་དཔལ་འཚལ་ལགས་སོ། །​འཇམ་དཔལ་གྱིས་སྨྲས་པ། ཇི་ལྟ་བུར་ཤེས། དེ་ནས་ཁྱེའུ་དེས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་སྨྲས་པ། གཟུགས་ནི་དབུ་བ་རྡོས་པ་འདྲ། །​ཚོར་བ་ཆུ་ཡི་ཆུ་བུར་བཞིན། །​འདུ་ཤེས་སྨིག་རྒྱུ་ལྟ་བུ་སྟེ། །​འདུ་བྱེད་རྣམས་ནི་ཆུ་ཤིང་བཞིན། །​རྣམ་ཤེས་སྒྱུ་མ་ལྟ་བུ་སྟེ། །​ཡོངས་སུ་རྟོགས་པས་ཀུན་ཏུ་བསྐྱེད། །​བྱིས་པས་ཡང་དག་མིན་བརྟགས་པ། །



The English translation of this folio by 84000 - Translating the words of the Buddha can be found at:
https://read.84000.co/translation/toh96.html?part=UT22084-046-002-626#UT22084-046-002-626