མཚན་རྣམ་པར་སྨིན་པར་འགྱུར་བ་དང་། མཛེས་པར་འགྱུར་བའི་བཟོད་པ་གང་ཡིན་པ་དེ་ནི་ང་རྒྱལ་གྱི་བཟོད་པའི་ཕ་རོལ་ཏུ་ཕྱིན་པའོ། །ནོར་བུ་རིན་པོ་ཆེའི་ཕྱིར་རྒྱ་མཚོ་ཆེན་པོ་བསྐམ་པར་སྤྲོ་བ་དང་། གང་གིས་རང་གི་ཆོས་མངོན་པར་འབྱུང་བར་བརྩོན་པ་གང་ཡིན་པ་དེ་ནི་ང་རྒྱལ་གྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཉོན་མོངས་པ་ཟིལ་གྱིས་གནོན་པར་འགྱུར་ཞིང་བསམ་པ་ཇི་ལྟ་བ་བཞིན་ཡེ་ཤེས་སྐྱེ་བར་འགྱུར་བའི་བསམ་གཏན་གང་ཡིན་པ་དེ་ནི་ང་རྒྱལ་གྱི་བསམ་གཏན་གྱི་ཕ་རོལ་ཏུ་ཕྱིན་པའོ། །ང་རྒྱལ་དང་། ལྟ་བ་ཀུན་དུ་འཇོམས་པར་འགྱུར་བའི་ཤེས་རབ་གང་ཡིན་པ་དེ་ནི་ང་རྒྱལ་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་ང་རྒྱལ་གྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་བཟོད་པ་ལས་བྱུང་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། བྱང་ཆུབ་ཀྱི་མཐར་འགྲོ་བའི་སེམས་ཀྱི་སྦྱིན་པ་གང་ཡིན་པ་དེ་ནི་བཟོད་པ་ལས་བྱུང་བའི་སྦྱིན་པའི་ཕ་རོལ་ཏུ་ཕྱིན་པ་སྟེ། དཔེར་ན་བདུད་ཀྱིས་སེམས་ཅན་དམྱལ་བ་བསྟན་པས་སྦྱིན་པ་སྦྱིན་པར་བྱེད་པ་བསལ་བར་མི་ནུས་པ་ནི་སྔོན་གྱི་ཚུལ་ལས་ཤེས་པར་བྱ་བ་ལྟ་བུའོ། །ཕྱིར་མི་ལྡོག་པའི་ཚུལ་ཁྲིམས་གང་ཡིན་པ་དེ་ནི་བཟོད་པ་ལས་བྱུང་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །དཔེར་ན་རྒྱལ་པོའི་བུ་བསོད་ནམས་འོད་འཕྲོ་འདི་ལྟར་རྣལ་འབྱོར་ལ་མངོན་དུ་ཕྱོགས་པ་སྦྱིན་པ་ལ་དབང་དུ་གྱུར་པ་ཞིག་བྱུང་བས་ཉི་མ་གཅིག་ལ་ཤིང་རྟ་དང་། རྟ་དང་། བཞོན་པ་དང་། གླང་པོ་དང་། གླང་པོ་ཆེ་དང་། དཔག་ཚད་ཁོར་ཡུག་ཙམ་གྱི་གདུགས་དང་། མུ་ཏིག་གི་དོ་ཤལ་ཕྲེང་བ་བརྒྱ་དང་། གོས་སྦྱིན་པ་དང་། རིན་པོ་ཆེའི་ཅོད་པན་དང་། མཆིལ་ལྷམ་སྟོང་ཕྲག་བརྒྱ་རི་བ་དང་། བུད་མེད་སྟོང་ཕྲག་བརྒྱད་ཅུ་དང་། སིལ་སྙན་དང་། རྒྱལ་པོའི་ཕོ་བྲང་འཁོར་དང་། སྐྱེད་མོས་ཚལ་དང་། མིག་སྦྱིན་པ་དང་། མགོ་དང་རྐང་པ་བཅད་ནས་སྦྱིན་པ་སྦྱིན་པར་བྱེད་པ་གང་ན་གང་གི་བཟོད་པ་གང་ཡིན་པ་དེ་ནི་བཟོད་པ་ལས་བྱུང་བའི་བཟོད་པའི་ཕ་རོལ་ཏུ་ཕྱིན་པའོ། །མི་གནས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ། དཔེར་ན་རྟའི་རྒྱལ་པོ་རྔོག་ལྡན་གྱིས་སེམས་ཅན་རྣམས་སྒྲོལ་བ་ལྟ་བུའོ།