སངས་རྒྱས་མ་བྱུང་བ་ན་བྱང་ཆུབ་སེམས་དཔའ་ཐ་ན་རྨི་ལམ་ན་ཡང་སེར་སྣའི་སེམས་མི་སྐྱེད་ན། དངོས་སུ་ལྟ་སྨོས་ཀྱང་ཅི་དགོས་པ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །ཐ་ན་སྲོག་འགགས་ཀྱང་ཁ་ན་མ་ཐོ་བ་རྡུལ་ཙམ་ལ་ཡང་བསླབ་པ་ལས་མི་འདའ་བ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཚེ་རབས་དེ་དང་དེ་དག་ཏུ་མངའ་བདག་ཏུ་གྱུར་པ་ན་ཡང་བཟོད་པའི་རང་བཞིན་དང་ལྡན་པ་ཡིན་ཞིང་མཉེན་པ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་བཟོད་པའི་ཕ་རོལ་ཏུ་ཕྱིན་པའོ། །ཚེ་རབས་ཐམས་ཅད་དུ་གཞན་གྱིས་བསྟན་པ་དང་མ་བསྟན་པ་བྱང་ཆུབ་ཀྱི་ཕྱིར་རྗེས་སུ་སྟོན་པ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཚེ་རབས་དེ་དང་དེ་དག་ནི་ལེགས་པར་བསམ་པ་སེམས་པ་ཡིན་ཞིང་ལེགས་པར་སྤྱད་པའི་ལས་བྱེད་ལ་དེ་ནི་ཤིན་ཏུ་དུལ་བའི་རང་བཞིན་དེ་ལྟ་བུར་གྱུར་པ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །སློབ་དཔོན་མེད་པར་འཇིག་རྟེན་པ་དང་འཇིག་རྟེན་ལས་འདས་པའི་བྱ་བ་ཁོང་དུ་ཆུད་ན་སེམས་ཅན་གྱི་ཚོགས་གཞན་ལ་དེ་ལྟ་བུའི་ཡེ་ཤེས་དེ་མེད་ཅིང་གང་གིས་ལུས་ཀྱི་ལས་སེམས་ཅན་དང་འཐུན་པ་གང་ཡིན་པ་དེ་ནི་གནས་པར་ལྟ་བས་ཡོངས་སུ་བསྔོས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་གནས་པར་ལྟ་བས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མི་གནས་པར་ལྟ་བས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པས་ཡོངས་སུ་ཟིན་པའི་སྦྱིན་པ་གང་ཡིན་པ་དེ་ནི་མི་གནས་པར་ལྟ་བས་ཡོངས་སུ་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །ལུས་དང་སེམས་ལ་དམིགས་པ་མེད་པའི་སེམས་ཀྱི་སྦྱིན་པ་གང་ཡིན་པ་དེ་ནི་མི་གནས་པར་ལྟ་བས་ཡོངས་སུ་བསྔོས་པའི་ཚུལ་ཁྲིམས་སོ། །ཕྱིར་མི་ལྡོག་པའི་ས་ལ་བཟོད་པ་གང་ཡིན་པ་དེ་ནི་མི་གནས་པར་ལྟ་བས་ཡོངས་སུ་བསྔོས་པའི་བཟོད་པའོ། །འདུ་བྱེད་ཐམས་ཅད་ལ་མི་གནས་ཤིང་ཀུན་ནས་དཀྲིས་པ་མེད་པའི་རྩོལ་བ་གང་ཡིན་པ་དེ་ནི་མི་གནས་པར་ལྟ་བས་ཡོངས་སུ་བསྔོས་པའི་བརྩོན་འགྲུས་སོ།