།དེ་བཞིན་གཤེགས་པ་ཀུན་དུ་འོད་དེ་ལ། །ཤིར་ཤའི་ཕྲེང་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྒྱ་མཚོ་དྲང་པོའི་ཚེ། །དེ་བཞིན་གཤེགས་པ་ཟླ་བའི་འོད་དེ་ཡི། །སྤྱན་སྔར་གླུ་དབྱངས་དག་ནི་བླངས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དག་མཛད་གྲོང་དཔོན་ཚེ། །དེ་བཞིན་གཤེགས་པ་ཡིད་འོང་ཟླ་བ་ལ། །གསེར་གྱི་མེ་ཏོག་དག་གིས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚོགས་ཅན་གྲོང་རྒྱལ་ཚོང་པའི་ཚེ། །དེ་བཞིན་གཤེགས་པ་མཛེས་པའི་དབྱངས་དེ་ལ། །ཁ་གཟར་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགའ་འོད་པད་མ་མཁན་གྱི་ཚེ། །དེ་བཞིན་གཤེགས་པ་བློ་གྲོས་མཆོག་དེ་ལ། །ཀ་རན་ཏ་ཀ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བྱང་ཆུབ་རྒྱལ་མཚན་མདུན་འདོན་ཚེ། །དེ་བཞིན་གཤེགས་པ་ཟླ་བའི་འོད་དེ་ལ། །ཆོས་ལ་དགབ་པའི་ན་བཟའ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་རིན་ཆེན་ཕྲེང་རྒྱུད་ཚེ། །དེ་བཞིན་གཤེགས་པ་མེ་ཏོག་སྙིང་པོ་ལ། །མེ་ཏོག་དག་ལས་བྱས་པའི་རྒྱལ་མཚན་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤིན་ཏུ་བསིལ་བ་ཁྱིམ་བདག་གི། །བུ་ཚེ་དེ་བཞིན་གཤེགས་པ་ཡིད་གཏོད་ལ། །ནོར་བུ་རིན་ཆེན་མཆིལ་ལྷམ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་རྒྱལ་དེད་དཔོན་ཚེ། །དེ་བཞིན་གཤེགས་པ་མཆོད་སྦྱིན་བྱིན་པ་ལ། །གསེར་ལས་བྱས་པའི་གོས་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་དགྱེས་པ་ཤིང་རྟ་མཁན། །བྱེད་ཚེ་བདེ་གཤེགས་ཡིད་བཞིན་འབྱོར་པ་ལ། །བཞུགས་ཁྲིའུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྫུ་འཕྲུལ་ཏོག་ནི་གར་མཁན་ཚེ། །དེ་བཞིན་གཤེགས་པ་ཐར་པ་དགྱེས་དེ་ཡི། །སྤྱན་སྔར་བྲོ་གར་དག་ནི་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།