།བདེ་གཤེགས་འཁྲུལ་པ་མེད་པར་སྦྱོར་བ་ལ། །ཁྲུས་ཁང་དག་ནི་བྱས་ཏེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཏོག་ལྡན་ཁྱིམ་བདག་ཚེ་ན་དེ་བཞིན་གཤེགས། །བརྩོན་འགྲུས་ཆེན་པོ་འཁོར་དང་བཅས་པ་བྱེ་བ་དག །དབྱར་གནས་ཟླ་གསུམ་ཞལ་ཟས་རོ་བརྒྱ་པ་གསོལ་ནས། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡུལ་འཁོར་སྤོབས་པ་དབུལ་པོའི་ཚེ། །དེ་བཞིན་གཤེགས་པ་ཡིད་འོང་དབྱངས་དེ་ལ། །མར་མེའི་སྙིང་པོ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་རབ་སྦྱིན་བྱི་བོ་བྱེད་པའི་ཚེ། །ཉི་མ་འགའ་ཞིག་ཚངས་པར་སྤྱོད་པ་མནོས་ནས་ཀྱང་། །དེ་བཞིན་གཤེགས་པ་ཀུན་དུ་དབྱངས་ཅན་དེ་ལ་ནི། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་བ་དགྱེས་པ་རྒྱལ་བུའི་ཚེ། །དེ་བཞིན་གཤེགས་པ་སྨོན་ལམ་སྦྱངས་པ་ལ། །སྒེའུ་གཤེར་མེ་ཏོག་དག་གིས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཁེངས་མེད་བཅའ་བ་མཁན་གྱི་ཚེ། །དེ་བཞིན་གཤེགས་པ་ལྷ་འདོད་དེ་ལ་ནི། །མར་ཁུར་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་སྟོབས་ནི་བྲམ་ཟེའི་ཚེ། །དེ་བཞིན་གཤེགས་པ་ཤེས་རབ་སྟོབས་དེ་ལ། །ཨ་མྲའི་འབྲས་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དབང་སྒྱུར་རྒྱལ་པོའི་ཁྱིམ་བདག་གི། །བུ་ཚེ་བདེ་གཤེགས་ཀུན་དུ་གཟིགས་དེ་ལ། །སླེ་ཏྲེས་ལོ་མ་དག་གིས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བདུད་རྩི་གསལ་བ་མཆོངས་མཁན་ཚེ། །དེ་བཞིན་གཤེགས་པ་ཚངས་པས་མཆོད་དེ་ལ། །གསེར་སྣམ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསམ་གཏན་སྙོམས་པ་ཤིང་སྲུངས་ཚེ། །དེ་བཞིན་གཤེགས་པ་ཐུབ་པའི་མེ་ཏོག་ལ། །མེ་ཏོག་དག་གིས་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཁྲུག་མེད་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ནམ་མཁའི་བློ་དེ་ལ། །ནོར་བུ་རིན་ཆེན་གླེགས་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།