།བདེ་གཤེགས་དབྱངས་ཀྱི་ཡན་ལག་ཁྱད་པར་འཕགས། །ཤིང་སྲུངས་ཚེ་ན་བདེ་གཤེགས་འོད་བྱེད་ལ། །ཕ་གུའི་འབྲས་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཆོག་ཏུ་མཛེས་གཤེགས་རྩིས་པ་ཡི། །བྲན་མོའི་ཚེ་ན་བདེ་གཤེགས་མེ་འོད་ལ། །མེ་ཏོག་ཀར་ནི་ཀ་རས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཞི་དོན་རྒྱལ་པོའི་ཕོ་ཉ་ཚེ། །དེ་བཞིན་གཤེགས་པ་བལྟ་ན་སྡུག་པ་ལ། །ལན་གྲངས་བརྒྱ་སྙེད་བསྐོར་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྐྱོན་མེད་རྟེན་བཅས་ཚེ། །དེ་བཞིན་གཤེགས་པ་སྣང་བར་དགྱེས་པ་ལ། །མོན་སྲན་སྡེའུ་ཡི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བློ་སྦྱངས་དགེ་བ་ཤིང་འཚོང་ཚེ། །སྒོ་གང་དག་ནི་དབུལ་བ་བྱས་ནས་ཀྱང་། །དེ་བཞིན་གཤེགས་པ་དགའ་བའི་དབྱངས་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་པད་མའི་མཛོད་ནི་དགེ་སློང་ཚེ། །དེ་བཞིན་གཤེགས་པ་མཆོད་སྦྱིན་བྱིན་པ་ལ། །སྐུ་ཡི་ཁྲུས་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་ཟེར་བཟང་པོ་དབུལ་པོའི་ཚེ། །དེ་བཞིན་གཤེགས་པ་བདེན་པའི་མཐུ་རྩལ་ལ། །བསོད་སྙོམས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོབས་པའི་མདོག་ནི་ཤིང་སྲུངས་ཚེ། །དེ་བཞིན་གཤེགས་པ་ཐོགས་མེད་བློ་དེ་ལ། །ཤུ་ཏིའི་མེ་ཏོག་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྟེགས་བཟང་སྒོ་བའི་ཚེ། །བདེ་གཤེགས་མདངས་འོད་གྲོང་ཁྱེར་གཤེགས་པ་ན། །ཐལ་མོ་སྦྱར་ཏེ་ཕྱག་དག་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚོགས་དབང་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ཟླ་བའི་སྙིང་པོ་ལ། །རྣ་རྒྱན་ཕྲེང་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།