།ལོ་མའི་སྤྱིལ་བུ་བྱས་ཏེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཁྲོ་བཅོམ་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ཙམ་པའི་མཆོག་དེ་ལ། །རྫིང་བུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཟུགས་མཆོག་ཐ་ག་པ་ཡི་ཚེ། །དེ་བཞིན་གཤེགས་པ་བརྟུལ་ཞུགས་སྙོམས་པ་ལ། །དབྱར་གནས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལེགས་གཤེགས་རོལ་མོ་མཁན་གྱི་ཚེ། །དེ་བཞིན་གཤེགས་པ་ཤེས་པའི་དཔལ་དེ་ལ། །རོལ་མོའི་རྔ་ཆེན་བརྡུངས་ཏེ་མཆོད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རབ་སྦྱིན་གྲགས་པ་ལ་ཀུ་ས་བྱེད་ཚེ། །དེ་བཞིན་གཤེགས་པ་གཟི་བརྗིད་ཆེན་པོ་དེ་ལ་ནི། །འདག་པའི་ཆལ་དག་སྦྱར་ཏེ་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་འོད་གཙང་ཁྱིམ་བདག་ཚེ། །དེ་བཞིན་གཤེགས་པ་སྣ་ཚོགས་གསུང་དེ་ལ། །བུ་ཡུག་ལངས་ཚེ་འཇམས་དང་བཏུང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྷ་ཉི་ཕྱུགས་རྫིའི་དཔོན་པོའི་ཚེ། །དེ་བཞིན་གཤེགས་པ་འདམ་ལས་རྒལ་བ་ལ། །ཞུན་མར་ཅི་དགོས་པ་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤེས་རབ་བྱིན་ནི་ཕུབ་མཁན་ཚེ། །དེ་བཞིན་གཤེགས་པ་མཐའ་ཡས་སྤྱན་དེ་ལ། །ཕུབ་དག་བྱས་ཏེ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཉམ་གཞག་བདག་ཉིད་ཁྱིམ་བདག་ཚེ། །དེ་བཞིན་གཤེགས་པ་བློ་འབར་དེ་ལ་ནི། །ཏིལ་འབྲུ་སྤར་བ་བཀང་སྟེ་གཏོར་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཟི་མདངས་འབྲུ་མར་སྤོས་ཅན་མཁན་གྱི་ཚེ། །དེ་བཞིན་གཤེགས་པ་མཆོད་པར་འོས་པའི་དཔལ་དེ་ལ། །སྣ་མའི་མེ་ཏོག་ཡོད་པའི་འབྲུ་མར་སྲང་བརྒྱད་ཕུལ། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྒྱལ་རིགས་ལམ་སྟོན་ཚེ། །དེ་བཞིན་གཤེགས་པ་སྣ་ཚོགས་དབྱངས་དེ་ལ། །ལམ་སྲང་དག་ནི་མཚོན་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐལ་ལྡན་ཤིང་རྟ་བུ་རམ་ཆང་མཁན་ཚེ།