།བུ་ཚེ་དེ་བཞིན་གཤེགས་པ་གྲགས་མཆོག་ལ། །སྐྱེད་མོས་ཚལ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ནོར་ལྷའི་བུ་ནི་ཚོང་དཔོན་བུ་མོའི་ཚེ། །དེ་བཞིན་གཤེགས་པ་ཡོན་ཏན་ཐམས་ཅད་རྫོགས་པ་པོ། །དེ་ལ་ཞབས་བཀྲུ་བ་དག་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གྲགས་པ་རྒྱལ་པོའི་བཙུན་མོའི་ཚེ། །དེ་བཞིན་གཤེགས་པ་བློ་བརྟན་དེ་ལ་ནི། །རང་གི་རྒྱན་རྣམས་དག་གིས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱལ་བ་རྒྱལ་པོའི་བུ་མོའི་ཚེ། །དེ་བཞིན་གཤེགས་པ་བདུད་རྩིའི་འོད་ཟེར་ཅན། །དེ་ལ་ཐོད་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱ་ཆེན་སྙིང་པོ་ཚོང་པའི་ཚེ། །དེ་བཞིན་གཤེགས་པ་དབྱངས་ཆེན་དེ་ལ་ནི། །མུ་ཏིག་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསོད་ནམས་འོད་ཟེར་ལྕགས་སྲུངས་ཚེ། །དེ་བཞིན་གཤེགས་པ་དབྱངས་གསལ་དེ་ལ་ནི། །སོག་མ་དག་ལས་བྱས་པའི་ཕྲེང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྨྲང་འདོན་འབྲུ་མར་མཁན་གྱི་ཚེ། །དེ་བཞིན་གཤེགས་པ་སྟོབས་ཆེན་དེ་ལ་ནི། །ལྷུང་བཟེད་འབྲུ་མར་དག་གིས་བཀང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྒྲོན་རྒྱལ་རྩིས་པའི་བུར་གྱུར་ཚེ། །དེ་བཞིན་གཤེགས་པ་མཐུ་རྩལ་ཆེན་པོ་ལ། །མེ་ཏོག་འབྲས་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་བརྩེགས་ནི་ལྗོངས་དག་གི། །ཕོ་ཉ་ཚེ་ན་དེ་བཞིན་གཤེགས་པ་པོ། །བདུད་རྩི་གསལ་ལ་སྦྲང་རྩིའི་བཏུང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྷ་མཆོག་ཤིང་སྲུངས་ཚེ། །དེ་བཞིན་གཤེགས་པ་བྱང་ཆུབ་མཐུ་རྩལ་ལ། །མ་ཏུ་ལུང་ག་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ས་བདག་ཁྱིམ་བདག་ཚེ། །དེ་བཞིན་གཤེགས་པ་སྒྲ་མཆོག་སེམས་པ་ལ། །ཁང་བརྩེགས་གོས་ཀྱིས་གཡོགས་པ་དག་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ།