།མངོན་སུམ་དག་ཏུ་བསྟོད་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ནོར་བུའི་ཟླ་བ་ལྷ་བུའི་ཚེ། །དེ་བཞིན་གཤེགས་པ་འཁྲུལ་མེད་གཤེགས་དེ་ལ། །ལྷ་ཡི་གཞལ་ཡས་ཁང་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དྲག་ཤུལ་འོད་ཟེར་དགོན་པ་ཡི། །དགེ་སློང་ཚེ་ན་བདེ་གཤེགས་ཡུལ་འཁོར་ལྷ། །དེ་ལ་ཆོས་གོས་སྣམ་སྦྱར་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྟུལ་ཞུགས་ཐུབ་མེད་རྒྱལ་བུའི་ཚེ། །དེ་བཞིན་གཤེགས་པ་མཛེས་པར་དགྱེས་དེ་ལ། །གདུགས་དང་དར་ཡུག་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་འགྲོས་མཆོད་གདོལ་བུའི་ཚེ། །ཉི་མ་འགའ་ཞིག་བསླབ་པ་ལྔ་མནོས་ནས། །དེ་བཞིན་གཤེགས་པ་མེ་ཏོག་དཔལ་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ནོར་བུའི་ཚོགས་ནི་བརྒྱ་བྱིན་ཚེ། །དེ་བཞིན་གཤེགས་པ་མི་འཇིགས་སྦྱིན་དེ་ལ། །གསེར་གྱི་ཤིང་རྟ་རྐྱེན་བཅས་སྟོང་སྙེད་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཇིག་རྟེན་བླ་མ་བྲམ་ཟེའི་ཚེ། །དེ་བཞིན་གཤེགས་པ་ལྷ་དགའ་དེ་ལ་ནི། །མ་དྷུ་ཀ་ཡི་མེ་ཏོག་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གླང་ཆེན་སེང་གེ་ལོང་བའི་ཚེ། །དེ་བཞིན་གཤེགས་པ་ཐར་པའི་འོད་དེ་ཡི། །འཆག་ས་དག་ནི་ཆག་ཆག་བཏབ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཟླ་བ་རྒྱལ་པོའི་བུར་གྱུར་ཚེ། །ཟླ་བ་བཞིར་ནི་དགེ་སློང་དགེ་འདུན་ན་བ་ཡི། །གསོས་སྨན་དག་ལ་སྤྱན་དྲངས་བདེ་གཤེགས་འོད་འཕྲོ་ལ། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་འོད་ཟེར་འཁོར་ལོས་སྒྱུར་བ་ཡི། །བཙུན་མོའི་ཚེ་ན་བདེ་གཤེགས་ཡོན་ཏན་འབྱུང་གནས་ལ། །ཡུ་བ་ནོར་བུས་སྤྲས་པའི་རྔ་ཡབ་དག་ནི་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྒྲ་གཅན་སྦེད་པ་ཚན་ཆེན་ཚེ། །དེ་བཞིན་གཤེགས་པ་བྱམས་པའི་བློ་དེ་ནི། །ལམ་དུ་ཞུགས་ཚེ་བསིལ་བའི་རླུང་ཡབ་བྱས། །