Degé Kangyur volume 45, F.302.b

སྤོང་བརྩོན་པའི། །​དགེ་སློང་ཚེ་ན་བདེ་གཤེགས་དཔག་མེད་པའི། །​ལྷ་ལ་ཨ་ཡོ་ག་དག་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཁ་ལོ་སྒྱུར་བ་དེད་དཔོན་ཚེ། །​དེ་བཞིན་གཤེགས་པ་འཕགས་པའི་མེ་ཏོག་ལ། །​ཙན་དན་དམར་པོའི་ཁང་བཟངས་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་དགའ་བའི་དབང་ཕྱུག་ཕྱུག་པོའི་ཚེ། །​དེ་བཞིན་གཤེགས་པ་མཆོད་སྦྱིན་ཆེན་པོ་ལ། །​རོལ་མོའི་སྒྲ་ཡིས་མཆོད་པ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་གཙུག་ན་རིན་ཆེན་རྩིས་པ་ཡི། །​ཁྱེའུ་ཚེ་དེ་བཞིན་གཤེགས་པ་ཏོག་ཆེན་ལ། །​མཚུངས་པ་མེད་པའི་ཕྱེ་མ་གཏོར་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་བསྙེངས་བྲལ་རྩྭ་འཚོང་ཚེ། །​དེ་བཞིན་གཤེགས་པ་ཉི་མའི་འོད་དེ་ལ། །​ཀ་པིད་ཏ་ཡི་ཕུར་མ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྒྲ་གཅན་ལྷ་ནི་ཤིང་འཚོང་ཚེ། །​དེ་བཞིན་གཤེགས་པ་རིན་ཆེན་འོད་དེ་ལ། །​རྩྭ་ལས་བྱས་པའི་མཆིལ་ལྷམ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ན་ཚོད་བཟང་པོ་གྲོང་སྲུངས་ཚེ། །​གྲོང་ཁྱེར་དག་གི་སྒོ་ནི་ཕྱེ་ནས་ཀྱང་། །དེ་བཞིན་གཤེགས་པ་རྨ་བྱའི་ང་རོ་ལ། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་ལྷ་དགའ་སྨན་པའི་ཚེ། །​དེ་བཞིན་གཤེགས་པ་ཀུན་ཏུ་རྣམ་རྒྱལ་ལ། །​ཤི་རི་ཤ་ཡི་མེ་ཏོག་གཏོར་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་རིན་ཆེན་ཕུང་པོ་སྨད་འཚོང་མའི། །​གཙོ་མོའི་ཚེ་ན་བདེ་གཤེགས་འབྱོར་འོད་ལ། །​ན་བ་མ་ལའི་མེ་ཏོག་གཏོར་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་མཛེས་གཤེགས་ཚོང་དཔོན་བུར་གྱུར་ཚེ། །​དེ་བཞིན་གཤེགས་པ་སྤྱན་ནི་མཐའ་ཡས་ལ། །​ཨུད་པ་ལ་ནི་གཅིག་ཅིག་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སེང་ཕྱོགས་བཙོ་བླག་མཁན་གྱི་ཚེ། །​དེ་བཞིན་གཤེགས་པ་སྙན་པར་དགྱེས་དེ་ཡི། །​ན་བཟའ་བཀྲུ་བཤལ་དག་ནི་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཤིན་ཏུ་མཐོར་གཤེགས་གླང་པོ་ཆེའི། །



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-14458#UT22084-045-001-14458