།མི་ཚེ་ལོ་གྲངས་དྲུག་ཁྲི་སུམ་སྟོང་ཡིན། །རྒྱལ་བ་མྱ་ངན་འདས་པའི་དམ་ཆོས་དག །ལོ་གྲངས་དྲུག་ཁྲི་དྲུག་སྟོང་བར་དུ་གནས། །འཇིག་རྟེན་ཕན་ཕྱིར་རྒྱལ་བའི་སྐུ་གདུང་དག །རྒྱས་འགྱུར་ཁམས་གསུམ་དག་ཏུ་གང་བར་འགྱུར། །དེ་བཞིན་གཤེགས་པ་ཤུགས་ཀྱིས་འདོར་བ་ཡི། །སྐྱེ་བའི་ཡུལ་ནི་དགའ་བ་གསལ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ལེགས་བྱིན་ཡིན། །མཆོག་སྦྱིན་འཇུག་ཅེས་བྱ་བ་རྒྱལ་བའི་ཡུམ། །སྲས་པོ་ཟླ་ལྡན་ཟླས་བྱིན་རིམ་གྲོ་པ། །རྡོ་རྗེའི་འགྲོས་ཞེས་བྱ་བ་མཁས་པ་སྟེ། །འབྱོར་པ་གསལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །དྲི་མེད་ཚུལ་འཆོས་མེད་པའི་དགྲ་བཅོམ་པ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །འགྲོ་ལ་ཕན་ཕྱིར་བྱམས་ལྡན་རྒྱལ་བ་ཡི། །སྐུ་གདུང་རྒྱས་འགྱུར་རྣམ་པར་གང་བར་འགྱུར། །དེ་བཞིན་གཤེགས་པ་སྟོབས་ཅན་སྐྱེ་བ་ཡི། །ཡུལ་ནི་གདུལ་བར་དཀའ་བ་ཞེས་ཀྱང་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སུམ་ཅུ་ཡབ་ནི་ཞུམ་མེད་ཡིན། །བསོད་ནམས་ཅན་ཞེས་བྱ་བ་རྒྱལ་བའི་ཡུམ། །སྲས་པོ་སྐྲུན་བྱེད་གཉི་ག་རིམ་གྲོ་པ། །ནོར་བུ་རྐང་ཞེས་བྱ་བ་མཁས་པ་སྟེ། །གསེར་སྒྲོན་ཞེས་བྱ་བ་ནི་རྫུ་འཕྲུལ་ཅན། །དེ་ན་འདུས་པ་ལན་གྲངས་དྲུག་ཅུ་སྟེ། །ཐམས་ཅད་དག་ལ་བྱེ་བ་དག་ནི་ཕྲག །དགུ་བཅུ་རྩ་ནི་བཞི་བཞི་ཚང་བར་འགྱུར། །མི་ཚེ་ལོ་གྲངས་བརྒྱད་ཁྲི་བརྒྱད་སྟོང་ཡིན། །འཁྲུགས་པ་མེད་པར་ཕྱིན་པའི་དམ་ཆོས་དག །ལོ་གྲངས་དགུ་ཁྲི་ཉིས་སྟོང་བར་དུ་གནས། །སྐུ་གདུང་མཆོད་རྟེན་དཔག་ཚད་རངས་པ་གཅིག །ནོར་བུའི་གདུགས་དང་བཀོད་པ་བླ་རེར་ལྡན། །དེ་བཞིན་གཤེགས་པ་ཤེས་རབ་མེ་ཏོག་གི། །སྐྱེ་བའི་ཡུལ་ནི་མཁས་པ་གསལ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སུམ་སྟོང་ཡབ་ནི་དབེན་མེད་ཡིན། །འབྲུག་སྒྲ་ཞེས་ནི་བྱ་བ་རྒྱལ་བའི་ཡུམ། །སྲས་པོ་སྒོམ་བྱེད་དུལ་བ་རིམ་གྲོ་པ། །ཡོན་ཏན་འོད་བཟངས་ཞེས་བྱ་མཁས་པ་སྟེ། །