འཇིགས་པ་མེད་པའི་འོད་ནི་རྒྱལ་བའི་ཡུམ། །སྲས་པོ་ཤེས་རབ་ཤེས་ཆེན་རིམ་གྲོ་པ། །ཏོག་གི་རྒྱལ་མཚན་ཞེས་བྱ་མཁས་པ་སྟེ། །གནས་པ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །དགྲ་དག་བཅོམ་པ་དེ་དག་འདུས་པའི་གྲངས། །འབུམ་ཕྲག་བདུན་ཅུ་རྩ་ནི་གསུམ་གསུམ་ཡོད། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །དངོས་པོ་མེད་པར་ཕྱིན་པའི་དམ་ཆོས་དག །ལོ་གྲངས་བདུན་ཁྲི་སུམ་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་གསུམ་པ་གཅིག་མུ་ཏིག་བླ་རེར་ལྡན། །དེ་བཞིན་གཤེགས་པ་ཆོས་ཀྱི་དབང་ཕྱུག་གི། །སྐྱེ་བའི་ཡུལ་ནི་ཐར་པའི་སྒྲ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །སྟོང་གཉིས་ཙམ་ཡོད་དབང་པོ་ཆེན་པོ་ཡབ། །ཡོན་ཏན་ཚོགས་ཞེས་བྱ་བ་རྒྱལ་བའི་ཡུམ། །སྲས་པོ་ལེགས་མཐོང་དགེ་བ་རིམ་གྲོ་པ། །བདུད་རྩིའི་འོད་ཅེས་བྱ་བ་མཁས་པ་སྟེ། །འབྱོར་བའི་སྒྲོན་མ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །བྱང་ཆུབ་ཏུ་ནི་སྐྱེ་བ་གཅིག་ཐོགས་པ། །བྱེ་བ་ཕྲག་ནི་ཁྲི་ཕྲག་བརྒྱ་བརྒྱ་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །དམ་ཆོས་ལོ་གྲངས་དུང་ཕྱུར་ཕྲག་དྲུག་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་གཅིག་པ་གཅིག་གསེར་གྱི་འོད་དང་ལྡན། །དེ་བཞིན་གཤེགས་པ་ཚངས་པའི་དབྱངས་དག་གི། །སྐྱེ་བའི་ཡུལ་ནི་སྒྲ་དབྱངས་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་མཐུ་ལྡན་ཡིན། །རིན་ཆེན་འོད་ཅེས་བྱ་བ་རྒྱལ་བའི་ཡུམ། །སྲས་པོ་རྒྱལ་མཆོག་སྐར་མཁན་རིམ་གྲོ་པ། །སེང་གེའི་འགྲོས་ཞེས་བྱ་བ་མཁས་པ་སྟེ། །བསོད་ནམས་འཁོར་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བཅུ་གཉིས་ཀུན་ལ་ཡང་། །འཕགས་པ་མཆོག་གནས་ངེས་པར་གྱུར་པ་པོ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །འཇིག་རྟེན་ཕན་ཕྱིར་སྲིད་མཐར་མཛད་པ་པོ། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་དྲུག་ཁྲིའི་བར་དུ་གནས་པར་འགྱུར།