།དམ་ཆོས་ལོ་གྲངས་སུམ་ཁྲི་དྲུག་སྟོང་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ལ། །དཔག་ཚད་སུམ་ཅུ་པ་སྟེ་གསེར་ལས་བྱས། །མུ་ཏིག་བླ་རེར་ལྡན་ཞིང་གསེར་གྱིས་སྤྲས། །དེ་བཞིན་གཤེགས་པ་བློ་གྲོས་ཟླ་མེད་པའི། །སྐྱེ་བའི་ཡུལ་ནི་མཁས་པས་མཆོད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ལྟེ་བ་བཟང་པོ་ཡབ། །ཡོན་ཏན་མཆོད་རྟེན་ཞེས་བྱ་རྒྱལ་བའི་ཡུམ། །སྲས་པོ་བློ་ལྡན་དྲན་ལྡན་རིམ་གྲོ་པ། །བྱང་ཆུབ་འོད་ཅེས་བྱ་བ་མཁས་པ་སྟེ། །ཡེ་ཤེས་འོད་བྱེད་པ་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །འཁྲུལ་མེད་ཡོན་ཏན་ཕ་རོལ་ཕྱིན་པ་པོ། །བྱེ་བ་ཕྲག་ནི་བདུན་ཅུ་དྲུག་དྲུག་ཡོད། །མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །བདེན་པ་གསུང་བ་མྱ་ངན་འདས་ནས་ཀྱང་། །དམ་ཆོས་ལོ་གྲངས་བདུན་ཁྲིར་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་གྲངས་ནི་ཐེར་འབུམ་དགུ་བཅུ་འབྱུང་། །དེ་བཞིན་གཤེགས་པ་རྡོ་རྗེ་མཁྲེགས་པ་ཡི། །སྐྱེ་ཡུལ་རབ་ཏུ་འདུལ་བར་དཀའ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་དབྱེར་མེད་ཡིན། །མི་ཐུབ་ཐུབ་ནི་རྒྱལ་ཡུམ་བསམ་གཏན་འགྲོ། །སྲས་ཡིན་ཆགས་པ་མེད་པ་རིམ་གྲོ་པ། །མཐུ་རྩལ་བརྟན་པོ་ཞེས་བྱ་མཁས་པ་སྟེ། །འགྲོས་མི་འཁྱིལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །མཆོག་ཏུ་ཞི་བར་ཕྱིན་པའི་བསམ་གཏན་པ། །བྱེ་བ་ཕྲག་ནི་བརྒྱད་ཅུ་བཞི་བཞི་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །སྐུ་གདུང་མཆོད་རྟེན་དཔག་ཚད་བཅུ་གཅིག་པ། །གཅིག་སྟེ་རིན་ཆེན་བརྒྱ་སྙེད་དག་གིས་སྤྲས། །དེ་བཞིན་གཤེགས་པ་བྱང་ཆུབ་བློ་གྲོས་ཀྱི། །སྐྱེ་བའི་ཡུལ་ནི་བློ་གྲོས་འཆང་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་ཤེད་བུ་ཡིན། །སྤོས་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་བློ་ལྡན་བློ་ཆེན་རིམ་གྲོ་པ། །བྱང་ཆུབ་རྒྱལ་མཚན་ཞེས་བྱ་མཁས་པ་སྟེ།