ཡབ་ནི་རིན་ཆེན་ལག་ཅེས་བྱའོ། །ཡུམ་ནི་རིན་ཆེན་མཐའ་ཡས་མ་ཞེས་བྱའོ། །སྲས་ནི་ཡོན་ཏན་རྣམ་པར་ལྟ་ཞེས་བྱའོ། །རིམ་གྲོ་པ་ནི་རིན་ཆེན་མིག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡོན་ཏན་བཀོད་པའི་ལུས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལུས་མ་སྨད་ཅེས་བྱའོ། །ཉན་ཐོས་འདུས་པ་ནི་ལན་བཅུ་བཞི་སྟེ། ཐམས་ཅད་ལ་ཡང་ས་ཡ་ཕྲག་དྲུག་དྲུག་གོ། །སྐུ་ཚེའི་ཚད་ནི་ལོ་སུམ་ཁྲིའོ། །དམ་པའི་ཆོས་ཀྱང་ལོ་སུམ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་དབང་ལྡན་སྐྱེ་བའི་ཡུལ་ནི་དབང་པོའི་རྒྱན་བཀོད་པ་རྣམ་པར་གྲགས་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བདུན་ཅུའོ། །ཡབ་ནི་དབང་པོས་བྱིན་ཞེས་བྱའོ། །ཡུམ་ནི་ལྷ་མ་ཡིན་གྱི་གཟི་བརྗིད་ཅེས་བྱའོ། །སྲས་ནི་དབང་གསལ་བྱིན་ཞེས་བྱའོ། །རིམ་གྲོ་པ་ནི་དཔལ་བརྩེགས་དབང་པོ་བརྟན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རྣམ་པར་སྣང་བྱེད་རྒྱལ་མཚན་གྲགས་པ་གསལ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཆགས་པ་མེད་པར་གནས་པ་ལ་མཁས་པ་ཞེས་བྱའོ། །ཉན་ཐོས་འདུས་པ་ནི་ལན་སུམ་ཅུ་རྩ་དྲུག་སྟེ། ཐམས་ཅད་ལ་ཡང་ཐེར་འབུམ་ཕྲག་དྲུག་ཅུ་དྲུག་ཅུའོ། །སྐུ་ཚེའི་ཚད་ནི་ལོ་འབུམ་མོ། །དམ་པའི་ཆོས་ནི་ལོ་བྱེ་བའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རྫོགས་པར་གསུང་བ་སྐྱེ་བའི་ཡུལ་ནི་བཀོད་པ་ཆེན་པོ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་ལྔ་བརྒྱའོ། །ཡབ་ནི་མི་ཐུབ་ཐུལ་ཞེས་བྱའོ། །ཡུམ་ནི་ཡོན་ཏན་གསལ་ཞེས་བྱའོ། །སྲས་ནི་བློ་མཆོག་ཅེས་བྱའོ། །རིམ་གྲོ་པ་ནི་ཞི་བ་གསལ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འཕགས་དད་གཟི་བརྗིད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་རྣམ་པར་གདོན་མི་ཟ་བའི་རྒྱལ་པོ་ཞེས་བྱའོ། །ཉན་ཐོས་འདུས་པ་ནི་ལན་བརྒྱད་ཅུ་རྩ་བཞི་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་དགུ་ཁྲིའོ། །དམ་པའི་ཆོས་ཀྱང་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ།