བྱེ་བ་ཕྲག་ནི་ཉི་ཤུ་གསུམ་གསུམ་ཡོད། །མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །ཞི་བར་བྱིན་པའི་དམ་པའི་ཆོས་དག་ཀྱང་། །ལོ་གྲངས་དགུ་ཁྲིའི་བར་དུ་གནས་པར་འགྱུར། །འཇིག་རྟེན་མཁྱེན་པ་མྱ་ངན་འདས་པ་ཡི། །སྐུ་གདུང་མཆོད་རྟེན་དཔག་ཚད་ལྔ་པ་གཅིག །དེ་བཞིན་གཤེགས་པ་ཡེ་ཤེས་མཐུ་རྩལ་གྱི། །སྐྱེ་བའི་ཡུལ་ནི་ཡེ་ཤེས་ལྟ་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་རྩ་གཅིག་ཤེས་ལྡན་བཟང་པོ་ཡབ། །ཤེས་མཆོག་མ་ཞེས་བྱ་བ་རྒྱལ་བའི་ཡུམ། །སྲས་པོ་ཤེས་ལྡན་ཤེས་ཆེན་རིམ་གྲོ་པ། །ཤེས་པའི་ཟླ་བ་ཞེས་བྱ་མཁས་པ་སྟེ། །བློ་ཡི་མར་མེ་མཁན་ནི་རྫུ་འཕྲུལ་ཅན། །འདུས་པ་ལན་གྲངས་བཅུ་སྟེ་ཀུན་ལ་ཡང་། །གསེར་དང་བོང་བར་མཚུངས་པར་མཐོང་བ་པོ། །བྱེ་བ་ཕྲག་ནི་ཁྲི་ཕྲག་གསུམ་གསུམ་ཡོད། །མི་ཚེ་ལོ་གྲངས་བདུན་ཁྲི་བརྒྱད་སྟོང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་བཞི་སྟོང་བར་དུ་གནས། །ཞི་བར་ཕྱིན་པའི་མཆོད་རྟེན་གྲངས་དག་ནི། །བྱེ་བ་སྟོང་ཕྲག་དགུ་བཅུ་རྩ་བརྒྱད་འབྱུང་། །འཇིག་རྟེན་མགོན་པོ་འོད་འཕྲོ་ཅན་སྐྱེ་བའི། །ཡུལ་ནི་གཟི་ལྡན་ལེགས་པར་མཆོད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་གསལ་བ་ཡིན། །རྡོ་རྗེའི་འོད་ནི་རྒྱལ་ཡུམ་སྲས་པོ་ནི། །འོད་འཕྲོ་འོད་འཕྲོ་བཟང་པོ་རིམ་གྲོ་པ། །ཡོན་ཏན་འོད་འཕྲོ་ཅན་ནི་མཁས་པ་སྟེ། །རྣམ་པར་གྲོལ་བའི་སྒྲོན་མ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །དགྲ་བཅོམ་མི་སློབ་ཉོན་མོངས་བསྲེགས་པ་པོ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །མྱ་ངན་འདས་ནས་དེ་ཡི་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ཡིད་དུ་འོང་བའི་གདུགས་སྟོང་སྙེད་ཀྱིས་བརྒྱན། །སེམས་ཅན་སྙིང་པོ་དབང་པོ་སྐྱེ་བ་ཡི། །ཡུལ་ནི་དབང་པོའི་ཏོག་དང་ལྡན་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་རྒྱལ་མཚན་དབང་པོ་ཡབ། །རིན་ཆེན་མཆོག་མ་ཞེས་བྱ་རྒྱལ་བའི་ཡུམ།