།འགྲོ་ལ་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་དགུ་ཁྲི་བརྒྱད་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ལྷ་མི་དག་གིས་རྟག་ཏུ་མཆོད་པར་འགྱུར། །འཇིག་རྟེན་མགོན་པོ་བརྒྱན་པ་སྐྱེ་བ་ཡི། །ཡུལ་ནི་གཟི་བརྗིད་ལེགས་པར་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་ཁྱད་པར་འཕགས། །བློ་བརྒྱན་མ་ཞེས་བྱ་བ་རྒྱལ་བའི་ཡུམ། །གནམ་པོ་སྲས་ཡིན་དེས་པ་རིམ་གྲོ་པ། །ཡོན་ཏན་བརྒྱན་ཅེས་བྱ་བ་མཁས་པ་སྟེ། །ལེགས་བསམས་སེམས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཐ་བ་མེད་པའི་བསམ་གཏན་པ་དེ་དག །དུང་ཕྱུར་ཕྲག་ནི་བརྒྱད་བརྒྱད་འདུས་པར་འགྱུར། །མི་ཚེ་ལོ་གྲངས་དག་ནི་བརྒྱད་ཅུ་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཞི་པ་བླ་རེས་མཛེས་པར་བྱས། །དེ་བཞིན་གཤེགས་པ་ཞུམ་པ་མེད་དབྱངས་ཀྱི། །སྐྱེ་བའི་ཡུལ་ནི་དབྱངས་དང་ལྡན་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་དབང་པོ་དབྱངས། །དབྱངས་སྙན་མ་ཞེས་བྱ་བ་རྒྱལ་བའི་ཡུམ། །སྲས་པོ་སྐད་སྙན་གདངས་མཆོག་རིམ་གྲོ་པ། །བྱམས་པའི་ང་རོ་ཞེས་བྱ་མཁས་པ་སྟེ། །མཆོག་གི་དབྱངས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །དགྲ་བཅོམ་ཐོབ་པ་རིམས་ནད་མེད་པ་པོ། །བྱེ་བ་ཕྲག་ནི་དགུ་བཅུ་དགུ་བཅུ་ཡོད། །མི་ཚེ་ལོ་གྲངས་དགུ་ཁྲི་སུམ་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་ཐམ་པར་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་འབུམ་ཕྲག་སྙེད་ཀྱིས་གང་བར་འགྱུར། །སངས་རྒྱས་རིན་ཆེན་འོད་ནི་སྐྱེ་བ་ཡི། །ཡུལ་ནི་བསོད་ནམས་གཟི་བརྗིད་བཟང་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གཉིས་ཡོད་ཡབ་ནི་ལེགས་དགའ་ཡིན། །དུལ་གནས་དགའ་ཞེས་བྱ་བ་རྒྱལ་བའི་ཡུམ། །སྲས་པོ་རྩི་སྨན་མཐུ་རྩལ་རིམ་གྲོ་པ། །སྲིད་པ་སེལ་ཞེས་བྱ་བ་མཁས་པ་སྟེ། །མེ་ཏོག་འོད་གསལ་བ་ནི་རྫུ་འཕྲུལ་ཅན།