།མི་ཚེ་ལོ་གྲངས་སུམ་ཁྲི་ཉིས་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །བཅུ་བདུན་དག་གི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་གསེར་རྒྱན་རྣམ་པར་སྦྱངས། །དེ་བཞིན་གཤེགས་པ་མངོན་པར་ཤེས་ཏོག་གི། །སྐྱེ་བའི་ཡུལ་ནི་ཏོག་གི་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཞི་ཡོད་མངོན་པར་ཤེས་པ་ཡབ། །ཡོན་ཏན་མངོན་ཤེས་རྡུལ་བྲལ་ཡུམ་ཡིན་སྲས། །མངོན་ཤེས་རྫུ་འཕྲུལ་བཟང་པོ་རིམ་གྲོ་པ། །སྨོན་ལམ་ཞེས་བྱ་བློ་གྲོས་ཅན་ཡིན་ཏེ། །གཞུང་ལ་རྣམ་པར་བསྒོམས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་དེ་ཀུན་ལ་ཡང་། །སློབ་པ་མེད་པར་ཕྱིན་པ་ཀུན་འདུ་སྟེ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དག་ནི་ཁྲི་ཡང་ཡིན། །རྒྱལ་བ་ཡོངས་སུ་མྱ་ངན་འདས་ནས་ཀྱང་། །དམ་ཆོས་ལོ་གྲངས་དྲུག་ཁྲིའི་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཞི་པ་གསེར་གྱི་བླ་རེར་ལྡན། །དེ་བཞིན་གཤེགས་པ་ཏོག་གི་འོད་སྐྱེ་བའི། །ཡུལ་ནི་བསོད་ནམས་ཕུང་པོ་ཞེས་ཀྱང་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ཕུང་པོ་བཟང་། །ཡོན་ཏན་མེ་ཏོག་རྡུལ་དང་བྲལ་བའི་ཡུམ། །ཕུང་པོ་སྲས་ཡིན་རི་རབ་རིམ་གྲོ་པ། །ཡོན་ཏན་དག་གིས་བརྒྱན་པ་མཁས་པ་སྟེ། །བྱང་ཆུབ་དག་ལ་གཞོལ་བ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་རྩ་ལྔ་སྟེ། །ཀུན་ལའང་ཐར་པ་ཐོབ་པར་འགྱུར་བ་དག །བྱེ་བ་ཕྲག་ནི་བརྒྱད་ཅུ་བརྒྱད་ཅུ་ཡོད། །མི་ཚེ་ལོ་གྲངས་སུམ་ཁྲི་སུམ་སྟོང་ཡིན། །དམ་པའི་ཆོས་ནི་ལོ་གྲངས་སྟོང་ཕྲག་ནི། །ཉི་ཤུ་རྩ་གཉིས་བར་དུ་གནས་པར་འགྱུར། །འཇིག་རྟེན་ཕན་པའི་ཕྱིར་ནི་རྒྱལ་བ་དེའི། །སྐུ་གདུང་དག་ནི་རྣམ་པར་རྒྱས་པར་འགྱུར། །དེ་བཞིན་གཤེགས་པ་མི་འདྲེན་དགེ་བ་ཡི། །སྐྱེ་བའི་ཡུལ་ནི་དགེ་དང་ལྡན་ཞེས་བྱ། །དེ་ཡི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སུམ་སྟོང་ཤིན་ཏུ་དགེ་བ་ཡབ། །དགེ་མཆོག་མ་ཞེས་བྱ་བ་རྒྱལ་བའི་ཡུམ། །སྲས་པོ་དགེ་བ་དགེ་བྱིན་རིམ་གྲོ་པ། །འགྲོ་བས་མཆོད་ཅེས་བྱ་བ་མཁས་པ་སྟེ། །འཇིག་རྟེན་དད་པར་བྱེད་པ་རྫུ་འཕྲུལ་ཅན།