།སྲས་པོ་ཤེས་བྱིན་ཤེས་བཟངས་རིམ་གྲོ་པ། །ཤེས་རབ་འབྱུང་གནས་ཞེས་བྱ་མཁས་པ་སྟེ། །ཤེས་རབ་རྣམ་པར་སྦྱངས་པ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་ཀུན་ལ་ཡང་། །དགྲ་བཅོམ་ཐམས་ཅད་ཐར་པར་གཞོལ་བ་པོ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དག་ནི་བཞི་ཁྲི་ཡིན། །ཡོངས་སུ་མྱ་ངན་འདས་པའི་དམ་ཆོས་དག །ལོ་གྲངས་སྟོང་ཕྲག་བཅྭ་ལྔར་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །འཕང་དུ་དཔག་ཚད་ལྔ་པ་འབྱུང་བར་འགྱུར། །འཇིག་རྟེན་མགོན་པོ་ལེགས་པར་གནས་པ་ཡི། །སྐྱེ་ཡུལ་ལེགས་པར་རབ་ཏུ་གནས་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་དོན་གནས་ཡིན། །ཡོན་ཏན་ལྡན་ཞེས་བྱ་བ་རྒྱལ་བའི་ཡུམ། །སྲས་པོ་ལེགས་མཐུ་བློ་མཐུ་རིམ་གྲོ་པ། །དགེ་གནས་ཞེས་ནི་བྱ་བ་མཁས་པ་སྟེ། །གཏི་མུག་མེད་པ་མཐའ་ཡས་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །དགྲ་བཅོམ་དག་ནི་ཚང་བར་འདུས་འགྱུར་ཏེ། །ཐེར་འབུམ་ཕྲག་ནི་དགུ་དགུ་འབྱུང་བར་འགྱུར། །མི་ཚེ་ལོ་གྲངས་སྟོང་ཕྲག་བཅུ་གཅིག་ཡིན། །ཡོངས་སུ་མྱ་ངན་འདས་པའི་དམ་ཆོས་དག །ལོ་གྲངས་བདུན་ཁྲི་བརྒྱད་སྟོང་ཚང་བར་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །གསེར་གྱི་རྒྱལ་མཚན་མཆོག་གིས་འཁོར་བར་གང་། །དེ་བཞིན་གཤེགས་པ་བློ་ནི་སྦྱངས་པ་ཡི། །སྐྱེ་ཡུལ་བསོད་ནམས་ལེགས་པར་བསགས་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་སྣང་ལྡན་ཡིན། །བདེན་ལྡན་མ་ཞེས་བྱ་བ་ཡུམ་ཡིན་ནོ། །སྲས་པོ་བློ་གྲོས་བློ་བཟངས་རིམ་གྲོ་པ། །འོད་ཟེར་ཆེན་པོ་ཞེས་བྱ་མཁས་པ་སྟེ། །དགའ་ཆེན་ཞེས་ནི་བྱ་བ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །སྲིད་པའི་འཆིང་བ་གཅོད་པར་བྱེད་པ་པོ། །བྱེ་བ་ཕྲག་ནི་བཅུ་བཅུ་འདུས་པར་འགྱུར། །མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །རྒྱལ་བ་མྱ་ངན་འདས་པའི་དམ་ཆོས་དག །ལོ་གྲངས་དྲུག་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ལྷ་རྫས་རྒྱལ་མཚན་མཆོག་གིས་མཛེས་པར་བྱས།