།རྫུ་འཕྲུལ་ཅན་རྣམས་ཀྱི་མཆོག་ནི་མཉམ་ཉིད་གནས་ཞེས་བྱའོ། །འདུས་པ་ནི་ལན་གཅིག་ཏུ་ཟད་དེ། དགྲ་བཅོམ་པ་སུམ་འབུམ་མོ། །སྐུ་ཚེའི་ཚད་ནི་ལོ་འབུམ་མོ། །དམ་པའི་ཆོས་ཀྱང་ལོ་འབུམ་གྱི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅྭ་ལྔ་པ། དེ་བཞིན་གཤེགས་པ་ཕྱོགས་བཟངས་སྐྱེ་བའི་ཡུལ་ནི་རིན་པོ་ཆེའི་ངོས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བདུན་བརྒྱའོ། །ཡབ་ནི་དབྱིག་གི་འོད་ཟེར་ཞེས་བྱའོ། །ཡུམ་ནི་ཡིད་དུ་འོང་བས་བྱིན་ཞེས་བྱའོ། །སྲས་ནི་དོན་ཡོད་དགའ་ཞེས་བྱའོ། །རིམ་གྲོ་པ་ནི་སྐར་མདའ་འདོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཁྱད་པར་དུ་འཕགས་པའི་བློ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་དགྲ་བཅོམ་གྲགས་པ་ཞེས་བྱའོ། །དགྲ་བཅོམ་པ་འདུས་པ་ནི་ལན་ཉི་ཤུ་རྩ་དགུ་སྟེ། ཐམས་ཅད་ལ་ཡང་བྱེ་བ་ཕྲག་ལྔ་ལྔའོ། །སྐུ་ཚེའི་ཚད་ནི་ལོ་ཁྲི་ཆིག་སྟོང་ངོ་། །དམ་པའི་ཆོས་ཀྱང་ལོ་ཁྲི་ཆིག་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཏོག་སྐྱེ་བའི་ཡུལ་ནི་ཏོག་མཆོག་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ཉི་ཤུའོ། །ཡབ་ནི་གཞལ་མེད་མཆོག་ཅེས་བྱའོ། །ཡུམ་ནི་ཡོན་ཏན་ལྟ་ཞེས་བྱའོ། །སྲས་ནི་རྣམ་པར་སྣང་བྱེད་ཅེས་བྱའོ། །རིམ་གྲོ་པ་ནི་ཡང་སྲིད་ཐུལ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཟག་པ་མེད་པའི་སེམས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འགོག་པ་ཐོབ་ཅེས་བྱའོ། །འདུས་པ་དང་པོ་ལ་ནི་དགྲ་བཅོམ་པ་དུང་ཕྱུར་ཕྲག་བཞིའོ། །གཉིས་པ་ལ་ནི་དུང་ཕྱུར་ཕྲག་དྲུག་གོ། །གསུམ་པ་ལ་ནི་ཐེར་འབུམ་མོ། །སྐུ་ཚེའི་ཚད་ནི་ལོ་དྲུག་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །མཆོད་རྟེན་ནི་བརྒྱད་ཁྲི་འབྱུང་ངོ་། །དེ་བཞིན་གཤེགས་པ་ཡུལ་འཁོར་མེ་ཏོག་སྐྱེ་བའི་ཡུལ་ནི་ཡོན་ཏན་གྱིས་བརྒྱན་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བདུན་སྟོང་ངོ་། །ཡབ་ནི་བསོད་ནམས་དཔལ་ཞེས་བྱའོ།