།དེ་བཞིན་གཤེགས་པ་ཚངས་པའི་ཏོག་དག་གི། །སྐྱེ་བའི་ཡུལ་ནི་ཚངས་པས་ལྟ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བདུན་ཅུ་རྩ་གཉིས་ཡབ་ནི་ཚངས་བཟངས་ཡིན། །ཚངས་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་ཚངས་པ་ཚངས་བཟངས་རིམ་གྲོ་པ། །བསམ་པ་སྙིང་རྗེ་ཅན་ནི་མཁས་པ་སྟེ། །བྱམས་ལ་གནས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །ཆགས་པ་མེད་གྱུར་གཏི་མུག་མེད་པ་ཀུན། །བྱེ་བ་ཕྲག་ནི་བཅུ་གསུམ་བཅུ་གསུམ་ཡོད། །མི་ཚེ་ལོ་གྲངས་དག་ནི་འབུམ་ཡང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་དགུ་ཁྲི་ཚང་བའི་བར་དུ་གནས། །རྒྱལ་བའི་མཆོད་རྟེན་སྐུ་གདུང་བཅས་པ་ནི། །དཔག་ཚད་བཅུ་གཉིས་པ་གཅིག་གསེར་གྱིས་བརྒྱན། །དེ་བཞིན་གཤེགས་པ་ཚོགས་ཅན་གཙོ་བོ་ཡི། །སྐྱེ་བའི་ཡུལ་ནི་བརྟགས་པའི་བློ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ཟླ་བཟངས་ཡིན། །སེམས་སྙོམས་མ་ཞེས་བྱ་བ་རྒྱལ་བའི་ཡུམ། །སྲས་པོ་པད་མ་ལྗོན་པ་རིམ་གྲོ་པ། །ཡོན་ཏན་དག་གིས་བརྩེ་བ་མཁས་པ་སྟེ། །བླ་མ་སེམས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །ཀུན་ལའང་ལྷག་མ་མེད་པ་རླུང་འདྲ་བ། །བྱེ་བ་ཕྲག་ནི་སྟོང་སྟོང་ཚང་བར་ཡོད། །མི་ཚེ་ལོ་གྲངས་སྟོང་ཕྲག་བཅྭ་བརྒྱད་ཡིན། །འདྲེན་པ་མྱ་ངན་འདས་ནས་དམ་ཆོས་དག །ལོ་གྲངས་སྟོང་ཕྲག་བཅུ་གསུམ་བར་དུ་གནས། །རིན་ཆེན་མཆོད་རྟེན་གྲངས་ནི་བྱེ་བ་ཕྲག །སྟོང་ཕྲག་ཆིག་བརྒྱ་རྩ་ནི་བཅུ་དག་འབྱུང་། །ཡོན་ཏན་བསགས་པ་སེང་གེའི་སྟབས་དག་གི། །སྐྱེ་ཡུལ་འཇིག་རྟེན་བླ་མ་དགྱེས་ཞེས་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །འཛམ་གླིང་གཉིས་ཁྱབ་ཡབ་ནི་ལེགས་གྲུབ་ཡིན། །དཀྱིལ་འཁོར་འགྲོ་ཞེས་བྱ་བ་རྒྱལ་བའི་ཡུམ། །སྲས་པོ་ཡིད་འཛིན་ཡིད་འོང་རིམ་གྲོ་པ། །བརྟུལ་ཞུགས་གྲུབ་པ་ཤེས་རབ་ཅན་ཡིན་ཏེ། །ང་རོའི་མཆོག་གྲུབ་པ་ནི་རྫུ་འཕྲུལ་ཅན། །འདུས་པ་དག་ནི་ལན་གྲངས་བརྒྱད་ཡིན་ཏེ། །དགྲ་བཅོམ་ཐེར་འབུམ་ཇི་སྙེད་ཡོད་པ་རྣམས། །གང་གཱའི་རྒྱུན་ལྟར་དྲི་མེད་ཤ་སྟག་ཡིན།