།ལོ་གྲངས་དྲུག་སྟོང་བར་དུ་གནས་པར་འགྱུར། །རྒྱལ་བའི་མཆོད་རྟེན་བྱེ་བ་ཉི་ཤུ་གཉིས། །རྒྱལ་མཚན་དམ་པ་བརྒྱ་སྙེད་དག་གིས་བརྒྱན། །རྒྱལ་བ་རྣམ་པར་ངེས་པའི་བློ་གྲོས་ཀྱི། །སྐྱེ་བའི་ཡུལ་ནི་མཆོད་པར་ངེས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅྭ་ལྔ་ཡབ་ནི་སུ་མེ་རུ། །ཡོན་ཏན་འཛིན་ཞེས་བྱ་བ་རྒྱལ་བའི་ཡུམ། །སྲས་པོ་མཚན་བཟང་ལེགས་མཐོང་རིམ་གྲོ་པ། །མཐུ་རྩལ་བཅུ་ལྡན་ཞེས་བྱ་མཁས་པ་སྟེ། །རྣམ་འཕྲུལ་ཀླུ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་ལྟ་བའི་དྲ་བསལ་བསམ་གཏན་པ། །བྱེ་བ་ཕྲག་ནི་བདུན་ཅུ་བདུན་བདུན་ཡོད། །མི་ཚེ་ལོ་གྲངས་སྟོང་ཕྲག་བཅྭ་བརྒྱད་ཡིན། །སྲིད་མཐར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་བདུན་སྟོང་བར་དུ་གནས། །རྒྱལ་བའི་མཆོད་རྟེན་བདུན་ཅུ་རྩ་བཞི་སྟེ། །རིན་ཆེན་དྲ་བ་ཡིད་དུ་འོང་བས་སྤྲས། །དེ་བཞིན་གཤེགས་པ་སྲིད་མཐའ་ནོར་བུའི་སྤོས། །སྐྱེ་བའི་ཡུལ་ནི་དགའ་བ་དད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བྱེ་བ་ཡབ་ནི་དགའ་འབྱོར་ཡིན། །ཡོན་ཏན་མཆོག་ཅེས་བྱ་བ་རྒྱལ་བའི་ཡུམ། །སྲས་པོ་དགེ་ལེགས་ཕན་ལྡན་རིམ་གྲོ་པ། །བདུད་འཇོམས་པ་ནི་བློ་གྲོས་ལྡན་པ་སྟེ། །བློ་མི་འཁྲུག་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དགུ་སྟེ་ཀུན་ལ་ཡང་། །མི་འཁྲུགས་ཡིད་ལྡན་རི་དང་མཚུངས་པ་པོ། །བྱེ་བ་ཕྲག་ནི་བདུན་ཅུ་རེ་རེ་ཡོད། །མི་ཚེ་ལོ་གྲངས་བྱེ་བ་བརྒྱ་ཕྲག་བཅུ། །དམ་ཆོས་ལོ་གྲངས་ཉི་ཁྲི་ཉིས་སྟོང་དང་། །གཞན་ཡང་དགུ་ཁྲི་དགུ་སྟོང་བར་དུ་གནས། །དཔག་ཚད་ལྔ་པའི་མཆོད་རྟེན་སྐུ་གདུང་བཅས། །གཅིག་སྟེ་རིན་ཆེན་རྒྱལ་མཚན་དྲ་བས་བརྒྱན། །དེ་བཞིན་གཤེགས་པ་རྒྱལ་བས་དགྱེས་པ་ཡི། །སྐྱེ་བའི་ཡུལ་ནི་སེམས་སྦྱངས་པ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དྲུག་ཡོད་ཡབ་ནི་ས་ག་ཡིན། །དགྲ་བཅོམ་དགའ་ཞེས་བྱ་བ་རྒྱལ་བའི་ཡུམ། །སྲས་པོ་མཆོད་ལེགས་གཉིད་སངས་རིམ་གྲོ་པ། །ཕས་ཀྱི་རྒོལ་བ་འཇོམས་པ་མཁས་པ་སྟེ། །འཇིག་རྟེན་བཀྲ་ཤིས་པ་ནི་རྫུ་འཕྲུལ་ཅན།