།དཔག་ཚད་གསུམ་ཡོད་ཡབ་ནི་ངོས་བཟངས་ཡིན། །དགའ་འགྲོ་མ་ཞེས་བྱ་བ་ཡུམ་ཡིན་ནོ། །སྲས་པོ་རྒྱལ་བྱིན་ལུས་བཟངས་རིམ་གྲོ་པ། །སྐྱབས་མཆོག་རྒྱལ་པོ་བློ་གྲོས་ལྡན་པ་སྟེ། །སྐར་མཁན་མཁས་པ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བདུན་ཏེ་ཀུན་ལ་ཡང་། །དྲང་སྲོང་གཏི་མུག་མེད་པར་ཐར་དགའ་བ། །བྱེ་བ་ཕྲག་ནི་དྲུག་ཅུ་བཞི་བཞི་ཡོད། །མི་ཚེ་ལོ་གྲངས་དག་ནི་ཉིས་སྟོང་ཡིན། །འཇིག་རྟེན་གསུམ་ལས་སྤགས་པའི་དམ་ཆོས་དག །ལོ་གྲངས་དགུ་ཁྲི་ཉིས་སྟོང་བར་དུ་གནས། །མཆོད་རྟེན་བཟང་པོའི་གྲངས་ནི་ཐེར་འབུམ་ཕྲག །དགུ་བཅུ་རྩ་ལྔ་དག་ནི་འབྱུང་བར་འགྱུར། །དེ་བཞིན་གཤེགས་པ་ན་ཚོད་བཟང་པོ་ཡི། །སྐྱེ་བའི་ཡུལ་ནི་རྟག་ཏུ་འདོད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་མྱ་ངན་མེད། །གྲགས་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་དགའ་ཆེན་ཟླ་བ་རིམ་གྲོ་པ། །འགྲོས་མཛེས་པ་ཞེས་བྱ་བ་མཁས་པ་སྟེ། །འཇིགས་མེད་ལྷ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་ཀུན་ལ་ཡང་། །ཡིད་གཉིས་དག་དང་བྲལ་བའི་དགྲ་བཅོམ་ཀུན། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དག་ནི་ཆིག་སྟོང་ཡིན། །རྒྱལ་བ་འཁྲུག་པ་མེད་པར་ཕྱིན་པ་ཡི། །དམ་ཆོས་ལོ་གྲངས་སུམ་སྟོང་བར་དུ་གནས། །སྐུ་གདུང་དག་ནི་རྒྱས་འགྱུར་མཆོད་རྟེན་གྲངས། །ཐེར་འབུམ་ཕྲག་གཉིས་སྐུ་གདུང་དག་གིས་བརྒྱན། །བདེ་བར་གཤེགས་པ་ལེགས་པའི་ཚོགས་ཅན་གྱི། །སྐྱེ་བའི་ཡུལ་ནི་གསེར་གྱི་རི་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་གསུམ་ཡོད་ཡབ་ནི་ལེགས་མཆོད་ཡིན། །ཚོགས་མཁས་མ་ཞེས་བྱ་བ་རྒྱལ་བའི་ཡུམ། །སྲས་པོ་བླ་མ་སྐྱོན་མེད་རིམ་གྲོ་པ། །རྣམ་པར་ལྟ་ཞེས་བྱ་བ་ཤེས་ཅན་ཏེ། །རྒྱ་མཚོ་བརྩེགས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་ལྔ་སྟེ་ཀུན་ལ་ཡང་། །སྲིད་པའི་སྲེད་ལ་ཆགས་པ་མེད་གྱུར་པ། །སྐྱེ་བའི་བཟློག་པ་དག་ནི་ཁྲི་ཁྲི་ཡོད། །མི་ཚེ་ལོ་གྲངས་དག་ནི་བཞི་སྟོང་ཡིན། །ཟད་མཐར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་དྲུག་སྟོང་བར་དུ་གནས་པར་འགྱུར།