།རྒྱལ་བ་སྒྲ་གཅན་ལྷ་ཞེས་བྱ་བ་ཡི། །སྐྱེ་ཡུལ་བཟང་པོའི་འབྱུང་གནས་ཞེས་ཀྱང་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་ཕྱེད་དང་གསུམ་ཡོད་གྲགས་བཟང་ཡབ། །སྐལ་ལྡན་འདོད་མ་དེ་བཞིན་གཤེགས་པའི་ཡུམ། །རིན་ཆེན་འོད་ཅེས་བྱ་བ་སྲས་ཡིན་ནོ། །མཐའ་ཡས་གཟུགས་ཞེས་བྱ་བ་རིམ་གྲོ་པ། །སྟོབས་བརྩོན་ཞེས་ནི་བྱ་བ་ཤེས་རབ་ཅན། །ཟླ་བའི་ཞལ་ཞེས་བྱ་བ་རྫུ་འཕྲུལ་ཅན། །དེ་ཡི་འདུས་པ་དང་པོར་དགྲ་བཅོམ་ཚོགས། །བྱེ་བ་ཚང་བར་ཡོད་དེ་གཉིས་པར་ཡང་། །བྱེ་བ་ཕྲག་དྲུག་གསུམ་པར་བྱེ་ཕྲག་ལྔ། །སྐུ་ཚེ་ལོ་གྲངས་སྟོང་ཕྲག་བརྒྱད་ཅུ་ཡིན། །གཞན་ཡང་དམ་ཆོས་ཕལ་ཆེན་ཕྱིར་ཞིང་གནས། །འདྲེན་པ་ཡི་ནི་མཆོད་རྟེན་གཅིག་འབྱུང་ལ། །དཔག་ཚད་གཅིག་པའི་གདུགས་ནི་ལྔ་བརྒྱས་ཁྱབ། །ཆོས་ཀྱི་རྒྱལ་པོ་རི་བོའི་རྒྱལ་མཚན་གྱི། །སྐྱེ་བའི་ཡུལ་ནི་རྒྱལ་བ་ཅན་ཞེས་བྱ། །རིགས་ནི་རྒྱལ་རིགས་ཡིན་ཏེ་སྐུ་ཡི་འོད། །རྒྱང་གྲགས་གཉིས་ཡོད་གཟི་བཟངས་ཡབ་ཡིན་ལ། །བདེ་བའི་འོད་ཅེས་བྱ་བ་ཡུམ་ཡིན་ནོ། །ཆོས་བཟངས་སྲས་ཡིན་སང་གྷིལ་རིམ་གྲོ་པ། །སྤྱོད་པའི་འོད་ཅེས་བྱ་བ་ཤེས་རབ་ཅན། །མྱ་ངན་མེད་དཔལ་ཞེས་བྱ་རྫུ་འཕྲུལ་ཅན། །འདུས་པ་དང་པོར་བྱེ་བ་བརྒྱ་ཕྲག་བཅུ། །གཉིས་པར་དགུ་ཡོད་གསུམ་པར་བྱེ་བ་བརྒྱད། །དེ་ཡི་ཚེ་ན་སྐྱེས་པ་བུད་མེད་ཀྱི། །ཚེ་ལོ་སྟོང་ཕྲག་ཉི་ཤུ་རྩ་ཡང་གཉིས། །འཇིག་རྟེན་རྣམ་འདྲེན་མྱ་ངན་འདས་ནས་ཀྱང་། །དམ་པའི་ཆོས་ནི་ལོ་གྲངས་བྱེ་བར་གནས། །སྐུ་གདུང་རིན་ཆེན་བདག་ཉིད་རིལ་པོ་གཅིག །མཆོད་རྟེན་གཅིག་ལ་སྣ་ཚོགས་གདུགས་སྟོང་ཡོད། །བདེ་བར་གཤེགས་པ་ཚོགས་ཅན་འོད་སྐྱེ་བའི། །ཡུལ་ནི་ཡུལ་འཁོར་བདེ་དང་ལྡན་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སུམ་ཅུ་ལེགས་པའི་ལྷ་ནི་ཡབ། །དགའ་བྱེད་གཟི་བརྗིད་ཡུམ་ཡིན་སྔོ་སངས་སྲས། །ལེགས་སེམས་གྲགས་པ་ཞེས་བྱ་རིམ་གྲོ་པ། །ང་རོ་ཡོད་པ་དེ་ནི་མཁས་པ་སྟེ། །རིགས་པར་དགའ་བ་རྫུ་འཕྲུལ་ཅན་ཡིན་ནོ། །འདུས་པ་དང་པོར་དགྲ་བཅོམ་བྱེ་བ་བརྒྱ། །