བསམ་པ་གྲུབ་པ་བཏང་སྙོམས་པ་གང་ཡིན་པ་དེ་ནི་སྦྱིན་པའིའོ། །ཕ་རོལ་པོ་གཞན་ལ་རག་ལས་པ་ལ་བཏང་སྙོམས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །སྙིང་རྗེའི་ཡོ་བྱད་བཏང་སྙོམས་པ་ནི་དཔེར་ན་བྱང་ཆུབ་ཀྱི་སྙིང་པོ་ལྟ་བུ་གང་ཡིན་པ་དེ་ནི་བཟོད་པའིའོ། །ཐམས་ཅད་དུ་བཏང་སྙོམས་མ་གཏུགས་པ་གང་ཡིན་པ་དེ་ནི་བརྩོན་འགྲུས་ཀྱིའོ། །ཆོས་སྟོན་པ་ན་བཏང་སྙོམས་པ་གང་ཡིན་པ་དེ་ནི་བསམ་གཏན་གྱིའོ། །ཆོས་བཤད་པ་བྱས་ནས་ལུས་ཀྱིས་གདམས་ངག་སྟོན་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་སོ་སོར་མ་བརྟགས་པའི་བཏང་སྙོམས་ཀྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཐ་དད་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཐ་དད་པའི་འདུ་ཤེས་ཀྱིས་མི་སྐྱེ་བ་གང་ཡིན་པ་དེ་ནི་སྦྱིན་པའིའོ། །དེ་བཞིན་ཉིད་དུ་འདུ་ཤེས་པས་ཕྱིན་ཅི་མ་ལོག་པར་སྐྱེ་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ཡོད་པ་མ་ཡིན་པའི་འདུ་ཤེས་གང་ཡིན་པ་དེ་ནི་བཟོད་པའིའོ། །བདག་གི་ལུས་དང་གཞན་གྱི་ལུས་ལ་འཁྲུལ་པ་མེད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །འདུ་ཤེས་པ་དང་ལྡན་པ་གང་ཡིན་པ་དེ་ནི་བསམ་གཏན་གྱིའོ། །ཐམས་ཅད་དེའི་ངོ་བོ་མ་ཡིན་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་ཐ་དད་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་འདུན་པ་ཡོངས་སུ་ཉམས་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཕ་རོལ་ལ་ཕན་པར་འདུན་པ་གང་ཡིན་པ་དེ་ནི་སྦྱིན་པའིའོ། །བདག་ལ་ཕན་པར་འདུན་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ཆོས་ཀྱི་གཞི་ལ་འདུན་པ་གང་ཡིན་པ་དེ་ནི་བཟོད་པའིའོ། །དུས་ཐམས་ཅད་དུ་འདུན་པ་གང་ཡིན་པ་དེ་ནི་བརྩོན་འགྲུས་ཀྱིའོ། །སྲེད་པ་སྤོང་བ་ལ་འདུན་པ་གང་ཡིན་པ་དེ་ནི་བསམ་གཏན་གྱིའོ། །མ་རིག་པ་སྤོང་བ་ལ་འདུན་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་འདུན་པ་ཡོངས་སུ་ཉམས་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བརྩོན་འགྲུས་ཡོངས་སུ་ཉམས་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཐམས་ཅད་དུ་སོང་བའི་བརྩོན་འགྲུས་གང་ཡིན་པ་དེ་ནི་སྦྱིན་པའིའོ། །གཞན་དད་པར་འགྱུར་བའི་བརྩོན་འགྲུས་གང་ཡིན་པ་དེ་ནི་ཚུལ་ཁྲིམས་ཀྱིའོ། །གདུལ་བའི་དུས་ལ་སྡོད་པ་གང་ཡིན་པ་དེ་ནི་བཟོད་པའིའོ།