།དེ་ལ་དཔྱོད་པ་སྤོང་བའི་རྫུ་འཕྲུལ་གྱི་རྐང་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། དཔྱོད་པ་ལ་མི་དགའ་བ་མེད་པ་གང་ཡིན་པ་དེ་ནི་སྦྱིན་པའིའོ། །ཡང་དག་པ་ཐོབ་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །རིག་པར་རྟོགས་པ་གང་ཡིན་པ་དེ་ནི་བཟོད་པའིའོ། །རྣམ་པར་གནོན་པ་ཐམས་ཅད་ཀྱི་རྗེས་སུ་སོང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །བག་ཆགས་ཁོང་དུ་ཆུད་པ་གང་ཡིན་པ་དེ་ནི་བསམ་གཏན་གྱིའོ། །བག་ཆགས་སྤོང་བ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་དཔྱོད་པ་སྤོང་བའི་རྫུ་འཕྲུལ་གྱི་རྐང་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བསམ་གཏན་དང་པོའི་ཕ་རོལ་ཏུ་ཕྱིན་པ་དྲུག་གང་ཞེ་ན། དམིགས་པ་ཐོབ་པ་གང་ཡིན་པ་དེ་ནི་སྦྱིན་པའིའོ། །ཁྱིམ་ལ་རྟོག་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །བསམ་གཏན་དང་པོ་མ་ཉམས་པ་གང་ཡིན་པ་དེ་ནི་བཟོད་པའིའོ། །ཡན་ལག་ལྔ་སྤོང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །རྩེ་གཅིག་པ་ཐོབ་པ་གང་ཡིན་པ་དེ་ནི་བསམ་གཏན་གྱིའོ། །ཡན་ལག་ལྔ་དང་ལྡན་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་བསམ་གཏན་དང་པོའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བསམ་གཏན་གཉིས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བསམ་གཏན་གཉིས་པ་ལ་མཚན་མར་འཛིན་པ་སྤོང་ཞིང་ཤིན་ཏུ་སྦྱངས་པ་གང་ཡིན་པ་དེ་ནི་སྦྱིན་པའིའོ། །བར་ཆད་མེད་པར་ཤེས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །རྟོགས་པ་གང་ཡིན་པ་དེ་ནི་བཟོད་པའིའོ། །ཤུགས་མི་གཏོང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །ཐར་པ་ལ་དམིགས་ཤིང་སྙོམས་པར་འཇུག་པ་གང་ཡིན་པ་དེ་ནི་བསམ་གཏན་གྱིའོ། །བདག་དང་གཞན་ལ་ཕན་པ་དང་ལྡན་པར་མཐོང་བ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་བསམ་གཏན་གཉིས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བསམ་གཏན་གསུམ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བསམ་གཏན་གསུམ་པའི་རོ་མྱང་བ་སྤངས་པ་གང་ཡིན་པ་དེ་ནི་སྦྱིན་པའིའོ། །རོ་མྱང་བ་མེད་པ་ལ་དགའ་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །དགའ་བ་དོན་དུ་གཉེར་བ་གང་ཡིན་པ་དེ་ནི་བཟོད་པའིའོ། །ཀུན་ནས་འཛིན་ཅིང་མ་བརྗེད་པ་གང་ཡིན་པ་དེ་ནི་བརྩོན་འགྲུས་ཀྱིའོ།