Degé Kangyur volume 45, F.62.a

གཅད་དུ་མེད་ཅིང་དབྱེར་མེད་ལ་མི་མཐོ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་མགུར་དུང་ལྟ་བུའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་རྣམ་པར་སྨིན་པ་སྒྲོས་བིམ་པ་ལྟར་དམར་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྒྲོས་བིམ་པ་ལྟར་དམར་ཞིང་འཛུམ་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །​སྒྲོས་བིམ་པ་ལྟར་དམར་ཞིང་ལེགས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །​ལྟག་འོག་ལེགས་པར་འབྱོར་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །གསུང་བ་དང་མི་གསུང་བར་གྱུར་པ་ན་རྟག་ཏུ་བལྟ་ན་ཡིད་དུ་འོང་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །​བྱི་རུ་ལྟར་སྣང་བ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །​བལྟ་ན་བརྟག་ཏུ་རུང་ཞིང་བལྟ་བས་མི་ངོམས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སྒྲོས་བིམ་པ་ལྟར་དམར་བའི་ཕ་རོལ་ཏུ་ཕྱིན་པ་དྲུག་གོ །​དེ་ལ་རྣམ་པར་སྨིན་པ་ཚེམས་མཆེ་བ་དཀར་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཤིན་ཏུ་དཀར་བ་གང་ཡིན་པ་དེ་ནི་གོས་དཀར་པོ་བྱིན་པའི་རྣམ་པར་སྨིན་པའོ། །​ཚེམས་དཀར་ཞིང་མདངས་དང་ལྡན་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །​བར་གྱི་དྲི་མ་བསལ་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །​ཚེམས་དཀར་ཞིང་མཁྲེགས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །​དྲི་ཞིམ་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །​ཡིད་དུ་འོང་ཞིང་མདངས་དང་ལྡན་ལ་འོད་གསལ་བ་བལྟ་བས་མི་ངོམས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཚེམས་མཆེ་བ་དཀར་བའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་ཚེམས་མཉམ་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཚེམས་ལྟག་འོག་མཉམ་པ་གང་ཡིན་པ་དེ་ནི་ཚེམས་མཉམ་པས་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །​ཚེམས་ལྟག་འོག་ཕྱིར་མ་གྱེད་ཅིང་ལེགས་པར་གྲུབ་པ་གང་



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-13977#UT22084-045-001-13977