སྐར་ཁུང་ཟླ་ཁམ་ལྟ་བུའི་དྲ་བའི་བུ་གནས་རེག་ན་བདེ་བའི་རླུང་གཏོང་བ། རྟ་བབས་དང་། ཡང་ཏོག་དང་། ཡང་ཏོག་ཆུང་ངུ་ནས་བདེ་བའི་རླུང་གཏོང་བ། རིན་པོ་ཆེའི་ཕྲེང་བ་བྲེས་པའི་སྒྲས་རྟག་ཏུ་མཛེས་པར་བྱས་པ། དྲི་རབ་ཏུ་ཞིམ་པ་འབྱུང་བའི་སྤོས་དང་མེ་ཏོག་གི་སིལ་མ་འཐོར་བ་ཡིད་དུ་འོང་བ། བཞིན་ཟླ་བ་དང་། ཉི་མ་དང་། མེ་ལོང་གི་དཀྱིལ་འཁོར་ལྟ་བུ། ལྷའི་ཁྱད་པར་གྱིས་གཟུགས་རབ་ཏུ་བརྒྱན་པའི་ལྷའི་བུ་མོ་དག་གནས་ཏེ། དྲང་སྲོང་ཆེན་པོ་ལྷའི་འདུན་ས་ཆོས་བཟངས་དེ་ན་ལྷའི་བུ་མོ་རོལ་མོའི་དབྱངས་སྒྲ་སྒྲོགས་སོ། །ལྷའི་འདུན་ས་ཆོས་བཟངས་དེ་ནི་གྲུ་བཞི་ལྷམ་པ། ཤིན་ཏུ་རྣམ་པར་ཕྱེ་བ། ངོས་ཡངས་པ། ཤིང་ལྗོན་པ་དང་། སྐྱེད་མོས་ཚལ་དང་། ནགས་དང་། ནགས་ཚལ་གཞན་རྣམ་པ་སྣ་ཚོགས་ཀྱིས་མཛེས་པར་བྱས་པ། རྒྱར་ཁོ་ར་ཁོར་ཡུག་ཏུ་དཔག་ཚད་བརྒྱ་ཡོད་པ། གསེར་དང་པད་མ་བཀྲམ་པ། མེ་ཏོག་སིལ་མ་བཀྲམ་པ། གླུ་དབྱངས་ཀྱི་སྒྲ་འབྱུང་བ། པད་མ་དང་ཤིང་ཡོངས་འདུ་ས་བརྟོལ་གྱིས་མཛེས་པར་བྱས་པའོ། །ལྷའི་འདུན་ས་ཆོས་བཟངས་དེ་ནི་ཡོ་བྱད་ཀྱི་ཁྱད་པར་ཐམས་ཅད་གསེར་དང་། དངུལ་དང་། བཻ་དཱུརྱ་དང་། སྤུག་དང་། རྡོའི་སྙིང་པོ་ལས་བྱས་པ། རིན་པོ་ཆེའི་ཕུང་པོ་ཡོངས་སུ་བཟུང་བ། གསེར་གྱི་སྙིང་པོས་ཀུན་ཏུ་ཁྱབ་པ། རི་རྣམ་པ་དུ་མས་ཉེ་བར་བསྐོར་ཅིང་སྣ་ཚོགས་རྣམ་པར་བཀྲ་བས་མཛེས་པར་བྱས་པ། ངོས་སྐྱེད་མོས་ཚལ་བརྒྱ་སྟོང་གིས་མཛེས་པར་བྱས་པ་སྟེ། སུམ་ཅུ་རྩ་གསུམ་གྱི་ལྷ་མྱ་ངན་དང་། ནད་ཀྱི་རྣམ་པའི་ཉེས་པ་ལས་གྲོལ་བ་དག་སྐྱེད་མོས་ཚལ་མཆོག་ཏུ་དགའ་འདུན་མྱོང་ནས་ལྷའི་འདུན་ས་ཆོས་བཟངས་དེར་འདུས་ཏེ་རྩེ་བ་རྗེས་སུ་མྱོང་ངོ་། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན་བལྟ་ན་སྡུག་ཅེས་བྱ་བའི་གཞལ་མེད་ཁང་ཟླ་བ་དང་ཉི་མ་དང་། མེ་ལོང་གི་ངོས་ལྟར་དྲི་མ་མེད་པ། དྲི་རབ་ཏུ་ཞིམ་པའི་སྤོས་དང་མེ་ཏོག་གིས་མཛེས་པར་བྱས་པ། ཕྲེང་བ་དང་བྱུག་པས་བྲེས་པས་མཛེས་པར་བྱས་པ། བུད་མེད་བརྒྱ་སྟོང་གིས་མཛེས་པར་བྱས་པ། འཇོ་ཞིང་སྒེག་པ། མིག་ཟུར་གྱིས་ལྟ་ཞིང་ཁྲོ་གཉེར་གྱི་རིམ་པ་གཡོ་བའི་ཆ་བྱད་ཅན་འཁོད་པ།