།གནས་བརྟན་བ་ལང་བདག་དེ་ལྷའི་བུ་དེ་དག་ལ་ཆོས་སྟོན་པ་ནི་འདི་ལྟ་སྟེ་མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། འདུལ་བའི་སྡེ་དང་། མདོ་སྡེའི་ལུང་གི་ཕྱོགས་ཡང་དག་པར་རབ་ཏུ་སྟོན་ཏེ། དེ་དག་དགའ་བ་དང་། དད་པ་སྐྱེད་དོ། །དེ་ལྷའི་སྐྱེད་མོས་ཚལ་དེ་ན་བསམ་གཏན་ལ་གནས་ཏེ་ཐམས་ཅད་བདེ་བ་དང་ལྡན་པར་སྐྱེད་མོས་ཚལ་ཤི་རི་ཤ་ཀ་ན་རྟེན་ཅིང་གནས་སོ། །དྲང་སྲོང་ཆེན་པོ་གཞན་ཡང་སུམ་ཅུ་རྩ་གསུམ་ལྷའི་རིས་དེ་ན་ལྷའི་འདུན་ས་ཆོས་བཟངས་ཞེས་བྱ་བ་ཡོད་དོ། །དེའི་ཀ་བ་བརྒྱད་ཁྲི་བཞི་སྟོང་གསེར་དང་། དངུལ་དང་། རྡོ་རྗེ་དང་། སྤུག་དང་། རྡོའི་སྙིང་པོ་ལས་བྱས་པ། ཙན་དན་མཆོག་ཤིང་གི་སྙིང་པོ་ལ་སོགས་པ་དྲིལ་བུ་གཡེར་ཀ་སྒྲ་སྙན་པའི་དྲ་བས་ཁེབས་པར་བྱས་པ། ས་ཕྱོགས་གསེར་གྱི་བྱེ་མ་བདལ་བའོ། །ལྷའི་འདུན་ས་ཆོས་བཟངས་ལྷའི་རས་རབ་ཏུ་སྦྱངས་པ། རྒྱལ་མཚན་དང་། གདུགས་དང་། བ་དན་བསྒྲེང་བ་དང་། ལྷའི་རོལ་མོ་ཁོང་ཧུ་དང་། པི་བང་དང་། གླིང་བུ་དང་། རྫ་རྔ་དང་། རྔ་པ་ཊ་ཧ་དང་། ལྕགས་ཀྱི་སིལ་ཁྲོལ་དང་། དུང་དང་། པི་བང་རྒྱུད་གསུམ་པ་རབ་ཏུ་སྒྲོགས་པ། ག་ཞ་དང་། སིལ་ཁྲོལ་དང་། ཅ་ཅོའི་སྒྲ་སྙན་པ་འབྱིན་པ་དང་ལྡན་པ། མེ་ཏོག་དང་། འབྲས་བུ་དང་། ཡལ་ག་དང་། ཁུ་བྱུག་གནས་ཤིང་ཕན་ཚུན་ནས་སྒྲ་འབྱིན་པ་དེ་ན་ལྷ་དང་། ལྷ་མོ་དེ་དག་དགའ་བ་དང་། བདེ་བ་སྐྱེ་བའི་བཞིན་གྱིས་གནས་སོ། །དྲང་སྲོང་ཆེན་པོ་ལྷའི་འདུན་ས་ཆོས་བཟངས་དེའི་སའི་ངོས་ནོར་བུ་རིན་པོ་ཆེས་རབ་ཏུ་སྤྲས་པ། ལྗང་གུས་བྱུགས་པས་མདོག་སྣུམ་ཞིང་བཻ་དཱུརྱ་ལྟར་དྲི་མ་མེད་དེ། མེ་ལོང་གི་ངོས་ལྟ་བུར་བྱས་པ་རབ་ཏུ་འཇམ་པ་ན་སྤོས་ཀྱི་ཕྱེ་མ་དང་། མེ་ཏོག་རྣམ་པ་སྣ་ཚོགས་འཐོར་བ། རླུང་དང་། ཉི་མ་དང་། ཤ་སྦྲང་དང་། སྦྲང་བུ་དང་། སྦྲུལ་གྱི་ཉེས་པ་ཡོངས་སུ་སྤངས་པ། ངང་གིས་གཉིད་དང་། སྙོམ་པ་དང་། ལེ་ལོ་རྣམ་པར་སྤངས་པ་མཐོང་ཁུང་དང་། སྐར་ཁུང་ཟླ་ཁམ་ལྟ་བུའི་དྲ་བའི་བུ་གནས་རེག་ན་བདེ་བའི་རླུང་གཏོང་བ།