མིག་ཟུར་གྱིས་ལྟ་ཞིང་ཁྲོ་གཉེར་གྱི་རིམ་པ་གཡོ་བའི་ཆ་བྱད་ཅན་འཁོད་པ། ངོས་མེ་ཏོག་རྣམ་པ་སྣ་ཚོགས་ཕལ་པོ་ཆེས་མཛེས་པར་བྱས་པ། ནོར་བུའི་སྐྱང་ནུལ་བྱས་པ། དྲིལ་བུ་གཡེར་ཀའི་དྲ་བ་བྲེས་པས་མཛེས་པར་བྱས་པ། རྟ་དང་། གླང་པོ་ཆེ་དང་། ཤིང་རྟའི་རྨིག་པས་རེག་ན་གསེར་གྱི་རྡུལ་ལྡང་བ་དང་། ཅོད་པན་ཆགས་ཤིང་འབྱོར་པས་མཛེས་པར་བྱས་པ་ཡོད་དོ། །དྲང་སྲོང་ཆེན་པོ་བལྟ་ན་སྡུག་ཅེས་བྱ་བའི་གཞལ་མེད་ཁང་དེ་ལ་ཀ་བ་དྲུག་ཁྲི་ཡོད་དེ། ཀ་ཞུ་ལྷའི་གསེར་དང་། དངུལ་དང་། བཻ་དཱུརྱ་ལས་བྱས་པ་སྣ་ཚོགས་ཀྱི་འཕྲས་རྣམ་པར་སྤྲས་པ། ཤིང་ཏ་མ་ལའི་ལོ་མ་དང་། ཨ་ག་རུ་དང་། བདུག་པའི་ཕྲེང་བ་དྲི་རབ་ཏུ་ཞིམ་པར་བྱས་པའི་ཁྱད་པར་ཅན་ནོ། །གཞལ་མེད་ཁང་དེ་ན་ལྷའི་དབང་པོ་བརྒྱ་བྱིན་གནས་ཏེ། ལྷའི་བུད་མེད་བརྒྱ་སྟོང་གིས་བསྐོར་བ། གསེར་དང་རྡོ་རྗེའི་མྱུ་གུས་ལུས་མཛེས་པར་བྱས་པ། ལྷའི་འདོད་པ་ལ་རྩེ་བ་རྗེས་སུ་མྱོང་བ། གླང་པོ་ཆེ་དགུ་ཁྲིའི་སྟོབས་དང་ལྡན་པ། ལག་པ་གླང་པོ་ཆེའི་སྣ་ལྟ་བུ། མདོག་གསེར་དྲི་མ་མེད་པ་ལྟར་སེར་བ། ལུས་གྲིམས་པ། རོ་སྟོད་སེང་གེའི་འདྲ་བ། རྣ་ཆ་དྲི་མ་མེད་པ་འགུལ་བས་ལུས་སྣང་བར་བྱས་པ། གོས་མཆོག་ཏུ་ཕྲ་ལ་རིང་ཞིང་ནར་བ། དབང་པོའི་བརྡ་སྤྲོད་པ་འདོད་ཅིང་བསྟན་བཅོས་ཤེས་ཤིང་མཁས་པ། ལྷའི་བུ་བརྒྱ་སྟོང་དུ་མ་རྗེས་སུ་འབྲང་ཞིང་ལྷའི་གསེར་གྱི་གཞལ་མེད་ཁང་གི་གནས་ན་རྒྱུ་བ། གསེར་གྱི་སྐུད་པ་དང་། སེ་མོ་དོ་དང་། དོ་ཤལ་གྱིས་བྲང་བརྒྱན་ཅིང་མཛེས་པར་བྱས་པ། ཧ་ཅང་ཚོ་བ་ཡང་མ་ཡིན། ཧ་ཅང་རིང་བ་ཡང་མ་ཡིན་པ། རྐང་པ་ཤིན་ཏུ་གནས་པ། བདུད་རྩིའི་རོ་དང་ལྡན་པའི་ཁ་ཟས་ཟ་བ། མཁུར་ཙོས་བུད་མེད་བརྒྱ་སྟོང་གིས་ཟུར་གྱིས་ལྟ་བ་དང་ལྡན་པ། གླང་པོ་ཆེ་ས་སྲུང་གི་བུ་རྒྱགས་པའི་རྣ་བའི་རླུང་གིས་སྒྲ་ཕྱུང་བ་སྟེ། དྲང་སྲོང་ཆེན་པོ་ལྷའི་དབང་པོའི་རྒྱལ་པོ་དེའི་ལུས་ལ་རུས་པ་མེད་དོ། །དེའི་ལུས་ལ་ནད་ཐམས་ཅད་མེད་དེ། དྲི་རབ་ཏུ་ཞིམ་པ་དང་ལྡན་ལ་གདངས་ཤིན་ཏུ་སྙན་ཅིང་འཇམ་པའི་དབྱངས་དང་ལྡན་ནོ། །ལྷའི་རྒྱལ་པོ་དེའི་ལུས་ཀྱི་དྲིས་ཕོག་ན་སྤོས་ཀྱི་གླང་པོ་ཆེ་རབ་ཏུ་རྒྱགས་ཤིང་བདོ་བ་ཡང་རྒྱགས་པ་ཡོངས་སུ་འབྲི་བར་འགྱུར་རོ།