།དེ་མའི་མངལ་ན་གནས་པའི་ཚེ་མ་འདོད་པའི་འདོད་ཆགས་ཀྱིས་ཀུན་ནས་བསྐོར་བར་མི་འགྱུར། དེ་དྲི་རབ་ཏུ་ཞིམ་པའི་ཆ་ལུགས་ལ་དགའ་བར་འགྱུར། གཉིད་ལོག་ན་ཡང་རྨི་ལམ་ན་ལྷའི་དོན་སྐུལ་བ་མཐོང་བར་འགྱུར་རོ། །དྲང་སྲོང་ཆེན་པོ་དེ་མངལ་ན་གནས་པ་ན་ཕྱིན་ཅི་མ་ལོག་པའི་རྨི་ལམ་མཐོང་ངོ་། །བཙས་པའི་དུས་ན་ཡང་འདོད་ཆགས་དང་། ཞེ་སྡང་དང་། གཏི་མུག་རྣམ་པར་སྤངས་ནས་བཙས་ཏེ། དེ་གཟུགས་བཟང་བ། བལྟ་ན་སྡུག་པ། མཛེས་པ། རྐང་པ་ཤིན་ཏུ་གནས་པ། ཤིས་པའི་ཡན་ལག་དང་ཉིང་ལག་འབྲེལ་པ། ལག་པ་དང་། རྐང་པ་རིང་ལ་སྦོམ་པ། རོ་སྟོད་སེང་གེ་ལྟ་བུ། སོ་ཐགས་བཟང་བ། ཤིན་ཏུ་འཇམ་པའི་ལུས་སོ། །དེ་གཅིག་ཏུ་འདོད་པའི་འདོད་ཆགས་ལ་ཆགས་པར་འགྱུར། །འདོད་ཆགས་མི་བཟད་པ། གོས་ཕྲ་བ་ལ་དགའ་བ། སྐྱེད་མོས་ཚལ་ལ་དགའ་བ། ལྷའི་དྲི་དང་རོལ་མོ་ལ་དགའ་བར་འགྱུར་རོ། །དེ་གསེར་དང་། ནོར་ཐམས་ཅད་འབྱོར་བའི་རིགས་ཆེན་པོར་སྐྱེ་སྟེ། སྦྱིན་པ་དང་། དུལ་བ་དང་། ཡང་དག་པར་སྡོམ་པ་ལ་དགའ་བར་འགྱུར་རོ། །གལ་ཏེ་འདོད་པ་ལ་ཤིན་ཏུ་ཆགས་ནས་སྦྱིན་པ་དང་། ཚུལ་ཁྲིམས་ལ་དགའ་བར་མ་གྱུར་ན། དེ་ཕྱིར་གཅིག་ནས་གཅིག་ཏུ་དབུལ་པོའི་རིགས་སུ་སྐྱེ་བར་འགྱུར་ཏེ། སེར་སྣ་ཅན་དང་། ཚུལ་ཁྲིམས་འཆལ་པ་རྣམས་ལ་བསྟོད་པ་དང་། ཧ་ཅང་སྔོ་བ་ཡང་མ་ཡིན་པ་དང་། ཧ་ཅང་དཀར་བ་ཡང་མ་ཡིན་པ་དང་། སྐྱེ་བོ་ཐམས་ཅད་དགའ་བ་དང་། གཞན་གྱི་ཆུང་མ་ལ་ཆགས་ཤིང་བདག་གི་ཆུང་མ་ལ་མི་ལྟ་བ་དང་། རྩ་ལག་གི་སྐྱེ་བོ་ལ་དགའ་བར་འགྱུར་རོ། །དྲང་སྲོང་ཆེན་པོ་འདི་ནི་སུམ་ཅུ་རྩ་གསུམ་ལྷའི་རིས་ནས་ཤི་འཕོ་བའི་ལྟས་འབྱུང་བའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དྲང་སྲོང་ཆེན་པོ་རྒྱས་པ་དང་། དྲང་སྲོང་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་དྲང་སྲོང་རྒྱས་པས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་དགུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།