གཟུངས་སྔགས་འདི་གང་ལ་བརྟེན་ནས་ཡིད་ལ་ནན་ཏན་དུ་བྱ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྡུག་བསྔལ་ལས་གྲོལ་བར་འདོད་ཅིང་ཟབ་མོའི་དོན་ལ་མོས་པས་ནན་ཏན་དུ་བྱའོ། །དེ་ནས་ཏྃ་ལས་བྱུང་བའི་འོད་ཟེར་ལས་སྟེང་འོག་ཐམས་ཅད་དུ་རྡོ་རྗེར་གྱུར་ཏེ། འཇམ་དཔལ་སྔགས་འདི་བརྗོད་པར་བྱའོ། །ཨོྃ་བཛྲ་ཛྭ་ལ་བཛྲ་ཏ་ན་ཧཱུྃ་ཕཊ། ཞེས་བརྗོད་པར་བྱའོ། །དེ་ནས་ཏྃ་ལས་བྱུང་བའི་ཡི་གེ་ཨེ་དཀར་པོ་བསྒོམ་པར་བྱའོ། །དེའི་སྟེང་དུ་བྃ་སྔོན་པོ་བསྒོམ་པར་བྱའོ། །དེའི་སྟེང་དུ་ལྃ་སེར་པོ་བསྒོམ་པར་བྱའོ། །དེའི་སྟེང་དུ་ཡྃ་ལྗང་གུ་བསྒོམ་པར་བྱའོ། །དེའི་སྟེང་དུ་རྃ་དམར་པོ་བསྒོམ་པར་བྱའོ། །དེ་རྣམས་ཀྱིས་འོད་ཟེར་འཕྲོ་བ་དང་བསྡུ་བ་བྱ་སྟེ། ཨོྃ་དྷརྨ་དྷཱ་ཏུ་བི་ཤུད་དྷ་ཧཱུྃ། ཨོྃ་ཨཾ་དྷཱ་ཏུ་བི་ཤུད་དྷ་ཧཱུྃ། ཨོྃ་ས་མནྟ་བི་ཤུད་དྷ་ཧཱུྃ། ཨོྃ་པྲཀྵ་ཀི་ཤུད་དྷ་ཧཱུྃ། ཨོྃ་ཀྵ་ཏ་བུ་ཐཱ་ན་བི་ཤུད་དྷ་ཧཱུྃ། ཨོྃ་ན་མཿསརྦ་ཏ་ཐཱ་ག་ཏ་མཎྜ་ལ་ས་མནྟ་པི་ཤུད་དྷ་ཧཱུྃ། འཇམ་དཔལ་དེ་ལྟར་སྔགས་དེ་བརྗོད་པས་དཀྱིལ་འཁོར་གྱི་ཁང་པ་བསྐྱེད་པར་བྱ་སྟེ། པདྨ་འདབ་མ་བཞི་པ་ཁ་དོག་སྣ་ཚོགས་པ་ལ་རྡོ་རྗེ་རབས་བསྐོར་བ་གྲུ་ཚད་བཞི་དང་ལྡན་པ་གྲུ་བཞིར་འདུག་ཅིང་སྒོ་བཞིར་ཀ་བ་བརྒྱད་དང་ལྡན་པ། དྲ་བ་དང་དྲ་བ་ཕྱེད་པ་དང་རིན་པོ་ཆེའི་ཆུན་འཕྱང་དང་ཏྭ་ར་ནི་ལ་སོགས་པས་མཛེས་པའོ། །དེ་ལྟར་དཀྱིལ་འཁོར་གྱི་ཁང་པ་དེ་འདྲ་བ་བསྐྱེད་དེ། དབུས་ཀྱི་ཟེ་འབྲུ་ལ་ནི་ཟླ་བ་དང་པདྨའི་སྟེང་དུ་ཏྃ་ལྗང་གུ་ལས་བྱུང་བའི་ཨུཏྤ་ལ་ཏྃ་དང་བཅས་པས། འཇིག་རྟེན་གྱི་ཁམས་ཐམས་ཅད་དུ་འོད་ཁ་དོག་སྣ་ཚོགས་པས་འཇིག་རྟེན་ཐམས་ཅད་སྤྲུལ་པ་ལྟ་བུ་དང་སྒྱུ་མ་དང་འཇའ་ཚོན་དང་སྨིག་རྒྱུ་དང་། ཆུ་ཟླ་དང་གཟུགས་བརྙན་ལྟ་བུར་མཐོང་ངོ་། །དེའི་ཨུཏྤ་ལ་ལས་བྱུང་བའི་སྒྲོལ་མའི་སྐུ་ལྗང་གུ་ཞལ་གཅིག་ཕྱག་གཉིས་པ་ཕྱག་གཡས་པ་མཆོད་སྦྱིན། གཡོན་པ་སྡོང་བུ་དང་བཅས་པའི་ཨུཏྤ་ལ་འཛིན་པ། མཛེས་པའི་སྐུ་རིན་པོ་ཆེའི་དོ་ཤལ་དང་སྙན་ཆ་དང་དཔུང་རྒྱན་དང་། རྒྱན་རྣམ་པ་སྣ་ཚོགས་པས་བརྒྱན་པ། གཞོན་ནུ་མ་ལང་ཚོ་ལ་བབ་པ་ཞལ་འཛུམ་བག་དང་བཅས་པ། མཉམ་པའི་སྐྱིལ་མོ་ཀྲུང་དང་བཅས་པས་ཟླ་བ་དང་པདྨའི་སྟེང་དུ་བཞུགས་པའོ།