འཇམ་དཔལ་གཟུངས་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཤིང་། དུས་གསུམ་གྱི་སངས་རྒྱས་ཐམས་ཅད་སྐྱེད་པའི་ཡུམ་སྒྲོལ་མ་ལམ་རུངས་པ་འཇོམས་པའི་སྒོ་ནས་བསྟོད་པ་སྟེ། ཕན་ཡོན་ནི་བསམ་གྱིས་མི་ཁྱབ་པའོ། །འཇམ་དཔལ་དེའི་ཕྱིར་བརྗོད་པར་བྱའོ། །གཟུངས་འདི་བརྗོད་པའི་གང་ཟག་ནི་སེམས་ཅན་དམྱལ་བ་དང་། ཡི་དགས་དང་དུད་འགྲོ་ལ་སོགས་པའི་གནས་སུ་ནམ་ཡང་སྐྱེ་བར་མི་འགྱུར་རོ། །ཡུལ་མཐའ་འཁོབ་དང་ཀླ་ཀློ་དང་། དབང་པོ་མ་ཚང་པ་ལ་སོགས་པར་ནམ་ཡང་སྐྱེ་བར་མི་འགྱུར་རོ། །རིམས་དང་། འབྲུམ་བུ་དང་། ནད་འགོ་བ་ལ་སོགས་པའི་ནད་ཀྱི་འཇིགས་པ་ཐམས་ཅད་ལས་གྲོལ་ཞིང་ནད་ཀྱི་འཇིགས་པ་མི་འབྱུང་ངོ་། །འཇིགས་པ་ཆེན་པོ་བརྒྱད་ལ་སོགས་པ་ལས་གྲོལ་བར་འགྱུར་རོ། །འཇམ་དཔལ་དུས་གསུམ་གྱི་སངས་རྒྱས་ཐམས་ཅད་ཀྱི་བསྟོད་པ་འདི་འཛིན་པའི་གང་ཟག་དེ་ནི། དུས་གསུམ་གྱི་སངས་རྒྱས་ཐམས་ཅད་ལ་མཆོད་པ་བྱས་པར་འགྱུར་རོ། །འདི་འཛིན་པའི་གང་ཟག་དེ་ནི་མཚམས་མེད་པ་ལ་སོགས་པའི་སྡིག་པ་མ་ལུས་པར་བྱང་བར་འགྱུར་རོ། །སངས་རྒྱས་ཐམས་ཅད་མཐོང་བར་འགྱུར་རོ། །དུས་མ་ཡིན་པར་འཆི་བ་མི་འབྱུང་ཞིང་། ནམ་འཆི་བའི་དུས་ཀྱི་ཚེ། དུས་གསུམ་གྱི་སངས་རྒྱས་ཐམས་ཅད་སྐྱེད་པའི་ཡུམ་སྒྲོལ་མ་མཐོང་བར་འགྱུར་རོ། །འདི་འཛིན་པའི་གང་ཟག་དེ་ནི་ཡིད་ལ་ཅི་བསམས་པ་ཐམས་ཅད་འགྲུབ་པར་འགྱུར་རོ། །གཟུགས་ཕུན་སུམ་ཚོགས་པ་དང་། ཁ་དོག་ཕུན་སུམ་ཚོགས་པ་ལ་སོགས་པ་ཕུན་སུམ་ཚོགས་པ་ཐམས་ཅད་འཐོབ་པར་འགྱུར་རོ། །རྨི་ལམ་ངན་པ་དང་། ལྟས་ངན་པ་དང་། མི་མ་ཡིན་པའི་པར་དུ་གཅོད་པ་ཐམས་ཅད་ཞི་བར་འགྱུར་རོ། །དུས་གསུམ་གྱི་བདེན་པ་ཡང་མཐོང་བར་འགྱུར་རོ། །ཡུམ་སྒྲོལ་མའི་སྐུ་དངོས་སུ་མཐོང་བར་འགྱུར་རོ། །ན་མཿསརྦ་ཏ་ཐཱ་ག་ཏ་སཾམྱཀ་སཾ་བུདྡྷ་ཡ་ཏྲེ་ཡ་ཏེ་ཏཱ་ར་ཏེ་ཏུ་ཏཱ་ར། ཞེས་བརྗོད་པར་བྱའོ། །བསྟོད་པའི་ལེའུ་སྟེ་གསུམ་པའོ།། །།དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུས་བཅོམ་ལྡན་འདས་ལ་གསོལ་པ།