།འཇམ་དཔལ་དེའི་ལས་ནི་ཕྲག་དོག་མེད་པར་མོ་ཐམས་ཅད་འགུགས་པ་ནི་ཕུག་རོན་གྱི་མིག་དང་ལྕེ་དང་སྙིང་དང་གོ་རོ་ཙན་དང་དངུལ་རྡོ་དང་དེ་རྣམས་ནིམ་པས་རིལ་བུ་བྱས་ཏེ་འདི་བརྗོད་པར་བྱའོ། །ཙ་ལ་པྲ་ཙ་ལ་ཤཱི་གྷྲཱཾ་ག་མི་དེ་བ་དངྟ་ཨུ་ཙ་ཏཱ་ཡ་ཨ་མུ་ཀཾ་བ་སཱ་ནཱཾ་མུག་ཏཾ་ཀུ་རུ་ན་ཡིན་མ་ཧཱ་རི་ཧད་ཏེ་ཧྲཱིཿསྭཱ་ཧཱ། ཞེས་བཟླས་ཏེ་བྱུགས་ན་མོ་ཐམས་ཅད་ཁུགས་པར་འགྱུར་དབང་དུ་འགྱུར་ཏེ་ཕྲག་དོག་མེད་པར་འགྱུར་རོ། །ལས་ཀྱི་རིགས་ཀྱི་ཡུམ་གྱི་ལེའུ་སྟེ་བཅུ་དྲུག་པའོ།། །།དེ་ལྟར་ལས་ཀྱི་བྱེ་བྲག་བསྟན་ནས་འཇམ་དཔལ་གཞོན་ནུར་གྱུར་པས་སྨྲས་པ། ལས་རྣམས་ཐམས་ཅད་ཀུན་རྫོགས་པར་བྱེད་པ་སྦྱིན་སྲེག་ཇི་ལྟར་ནན་ཏན་དུ་བྱ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཐམས་ཅད་ཀྱི་སྔོན་དུ་འགྲོ་ཞིང་སོ་སོའི་ལས་བསྒྲུབ་པའི་ཕྱིར་སྦྱིན་སྲེག་བྱའོ། །དེ་ལ་དང་པོ་ཞི་བའི་ལས་བྱ་བ་ནི་ཚེས་གསུམ་པའི་ཟླ་བ་ལ་ཁ་དོག་དང་མཐུན་པའི་ཁང་བུ་བྱ་སྟེ་རྡོ་རྗེ་དཀར་པོ་དགོད་པར་བྱའོ། །བུད་ཤིང་ནི་ཙནྡན་དཀར་པོའི་ཤིང་ལ་སོགས་པ་ལ་བྱའོ། །དེ་ལ་མེ་སྦར་ཏེ་སྐུ་གཟུགས་མདུན་དུ་བཞག་སྟེ་འབྲས་དང་ཁྲེ་དང་ཅི་ཙེ་དང་ཏིལ་དཀར་པོ་ལ་སྔགས་གདབ་པ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ལན་བདུན་ནམ་ཉི་ཤུ་རྩ་གཅིག་ཏུ་བཟླས་ཏེ་མེའི་ནང་དུ་དོར་བར་བྱའོ། །ཞོ་དང་འོ་མ་ལ་སྔགས་བཏབ་སྟེ་ཤཱནྟིཾ་ཀུ་རུ་དང་བཅས་པས་དབུལ་བར་བྱའོ། །འོ་མ་ཅན་གྱི་ཤིང་དང་མར་དཀར་པོ་ལ་ནི་སརྦ་པཱ་བཾ་དང་བཅས་པས་ཕུལ་ཏེ་བསྟོད་པ་བྱའོ། །འཇམ་དཔལ་མེ་ཏོག་དཀར་པོ་དང་བཅས་པའི་མེའི་ཁང་པར་ཙནྡན་ལ་སོགས་པའི་དྲི་ཞིམ་པོའི་ཤིང་ལ་མེ་སྦར་ཏེ། སྐུ་གཟུགས་མདུན་དུ་བཞག་ལ་ཆུ་དང་ཡུངས་ཀར་ལ་སྔགས་བཏབ་ལ་མེར་གཏོར་བའི་སྔགས་ནི། །ཏདྱ་ཐཱ། ཨོཾ་སརྦ་ཏ་ཐཱ་ག་ཏ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་དང་སརྦ་བཱ་བཾ་ཤཱནྟིཾ་ཀུ་རུ་སྭཱ་ཧཱ། ཞེས་བྱ་བ་ཆུ་ཁྱོར་བ་བརྒྱ་རྩ་བརྒྱད་དབུལ་བར་བྱའོ། །འཇམ་དཔལ་དེའི་ཕན་ཡོན་ནི་མཚམས་མེད་པ་ལ་སོགས་པའི་སྡིག་པ་ཞི་བར་འགྱུར་རོ། །ནད་འགོ་བ་དང་གདོན་ལ་སོགས་པ་ཐམས་ཅད་ཀྱང་ཞི་བར་འགྱུར་རོ། །སྐྱེ་བ་ཐམས་ཅད་དུ་ཚེ་རབས་དྲན་པར་འགྱུར་རོ། །འཇམ་དཔལ་བའི་རྣམ་པ་ལྔས་བྱུག་པས་བྱུགས་ཏེ།