ཀྱིས་སྟོད་གཡོགས་པ་ཞབས་གཡས་བརྐྱང་བ་གཡོན་བསྐུམ་པས་བཞུགས་པ་ཞལ་གཅིག་ཕྱག་གཉིས་པ་ཞལ་མཆེ་བ་གཙིགས་པ་སྤྱན་ནི་རབ་ཏུ་འབར་ཞིང་དབུ་སྐྲ་གྱེན་དུ་བརྫེས་པ་དབུའི་ཟླ་བའི་སྟེང་ན་ཨ་མི་ཏཱ་བྷ་དང་བཅས་པ་བསྐལ་པའི་མེ་དཔུང་ནང་ན་བཞུགས་པ་ཕྱག་གཡས་ན་འཁོར་ལོ་འཛིན་པ་གཡོན་སྡིགས་མཛུབ་དང་བཅས་པའི་ཨུཏྤ་ལ་སྡོང་བུ་དང་བཅས་པ་འཛིན་པ། སྐུ་ལས་ཁྲོ་བོ་འཕྲོ་བ་ཁྲོ་མོ་དཔག་ཏུ་མེད་པ་དང་ལྷན་ཅིག་ཏུའོ། །དེའི་བཟླས་པ་ནི་འདིའོ། །ཨོཾ་ཏུ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བཟླས་པར་བྱའོ། །དེ་ནས་ལས་ཀྱི་སྔགས་དང་བཅས་པ་ལན་གཅིག་གམ་བདུན་ནམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་བཟླས་ཤིང་ཉིན་ལན་གསུམ་མཚན་ལན་གསུམ་བཟླས་ནས་གསོལ་བ་བཏབ་ན་འགྲུབ་པར་འགྱུར་རོ། །འཇམ་དཔལ་འདིའི་ཕན་ཡོན་ནི་ཉོན་མོངས་པ་དང་ལས་དང་རྣམ་པར་སྨིན་པ་དང་ངན་སོང་ལ་སོགས་པ་ཐམས་ཅད་འཇོམས་པའོ། །འཇམ་དཔལ་མ་རུངས་པའི་དགྲ་དང་གདོན་དང་བགེགས་ལ་སོགས་པ་ཐམས་ཅད་འཇོམས་པར་འགྱུར་རོ། །དྲག་པོའི་ཕྲིན་ལས་ཀྱི་ལེའུ་སྟེ་བཅུ་པའོ།། །།འཇམ་དཔལ་ཕྲིན་ལས་སྣ་ཚོགས་པའི་ལས་ནི་འདིའོ། །དུར་ཁྲོད་དམ་ཤིང་གཅིག་གམ་མཆོད་རྟེན་གྱི་མདུན་ནམ་ཆུ་བོ་ཆེན་པོའི་འགྲམ་དུ་ལས་བྱའོ། །ཁང་པ་དེར་བའི་རྣམ་ལྔས་སྐྱོང་ནུལ་བྱ་སྟེ། དྲི་ཞིམ་པོས་བྱུགས་པའི་མཎྜལ་ལ་མེ་ཏོག་སིལ་མ་དགྲམ་པར་བྱའོ། །ཡུམ་གྱི་སྐུ་གཟུགས་ཀྱང་བཞུགས་ཏེ། སྦྲ་ཚིལ་ལས་བྱས་པའི་གཟུགས་ཀྱི་སྙིང་གར་དུར་ཁྲོད་ཀྱི་རས་ལ་སྔགས་བཅུ་པ་དང་གསལ་བའི་ཡི་གེ་གཉིས་དང་བཅས་པ་ལ་མིང་གི་ཡི་གེ་མཐའ་དང་བཅས་པ་བཅུག་སྟེ། མཎྜལ་གྱི་དབུས་སུ་གཞག་པར་བྱའོ། །པོག་པོར་དང་མེ་ཏོག་ལ་སོགས་པ་ཡང་གཞག་པར་བྱས་ནས། དེ་ནས་བསམ་གཏན་བསྒོམ་པ་ནི་ཏྃ་ལས་བྱུང་བའི་མྱུར་བའི་བརྩོན་འགྲུས་དང་ལྡན་པའི་སྐུ། ཡུམ་སྒྲོལ་མ་དཔའ་མོ་རྣལ་འབྱོར་པའི་ལུས་སུ་བསྒོམ་པ་ནི། པདྨ་ལས་བྱུང་ཞིང་ཉི་ཟླའི་སྟེང་ན་སྐུ་མདོག་ནག་པོ་ཤིན་ཏུ་འཚེར་བ་གཞོན་ནུ་ལང་ཚོ་ལ་བབ་པ་ལྟ་བུའི་སྐུ་དོ་ཤལ་དང་དཔུང་རྒྱན་དང་རིན་པོ་ཆེའི་ཆུན་འཕྱང་ལ་སོགས་པས་མཛེས་པར་བརྒྱན་པ། པཉྩ་ལི་ཀའི་གོས་ཀྱིས་སྨད་དཀྲིས་པ་ཀ་ཤི་ཀའི་གོས་ཀྱིས་སྟོད་གཡོགས་བྱས་པ་ཞབས་བརྐྱང་བསྐུམ་དུ་བཞུགས་པ་ཞལ་གཅིག་ཕྱག་གཉིས་པ་མཆེ་བ་ཟླ་བ་ཕྱེད་པ་ལྟ་བུ་གཅིགས་པ་ཞལ་ཁྲོ་གཉེར་ཧཱུྃ་སྒྲ་དང་བཅས་པ་དབུ་སྐྲ་དམར་སེར་གྱེན་དུ་ཕྱོགས་པ་དབུ་ལ་ཟླ་བའི་སྟེང་ན་ཨ་མི་ཏཱ་བྷ་བཞུགས་པ།