Degé Kangyur volume 94, F.210.b

འོད་འཕྲོ་བ་དང་བཅས་པ་ལས་རང་དང་མཐུན་པའི་འོད་འཁྲུག་པ་དང་བཅས་པའི་སྐུ་བྱང་ཆུབ་སེམས་དཔའ་དཔག་ཏུ་མེད་པ་ལྷ་མོ་དཔག་ཏུ་མེད་པ་དང་བཅས་པ་བསམ་སྟེ་བཟླས་པ་འདི་བྱའོ། །​ཨོཾ་ཏུཏྟཱ་རེ་ཏུ་རེ་སྭཱ་ཧཱ། ཞེས་བཟླས་པར་བྱའོ། །​དེ་ནས་ལས་ཀྱི་སྔགས་དང་བཅས་པ་ལན་གཅིག་གམ་བདུན་ནམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་བཟླས་ནས་གསོལ་བ་བཏབ་ན་འགྲུབ་པར་འགྱུར་རོ། །​འཇམ་དཔལ་དེའི་ཕན་ཡོན་ནི་ས་བདག་གི་རྒྱལ་པོ་ལ་སོགས་པ་འཇིག་རྟེན་གསུམ་པོ་ཐམས་ཅད་དབང་དུ་འགྱུར་རོ། །​ཐམས་ཅད་ཁུགས་པར་འགྱུར་རོ། །​དབང་གི་ལས་ཀྱི་ལེའུ་སྟེ་དགུ་པའོ།​། །​།འཇམ་དཔལ་དྲག་པོའི་ལས་བྱ་བར་འདོད་པས་གནས་ནི་དུར་ཁྲོད་དམ་ཤིང་གཅིག་གམ་ཆུ་བོ་ཆེན་པོའི་འགྲམ་མམ་གཙུག་ལག་ཁང་དུ་བྱའོ། །​ཁང་པ་དེར་བའི་རྣམ་ལྔས་ཆག་ཆག་བཏབ་སྟེ་དྲི་ཞིམ་པོའི་ཆུས་མཎྜལ་བྱའོ། །​སྐུ་གཟུགས་ལ་སོགས་པ་ཡང་དགྲམ་པར་བྱའོ། །​གྲོ་གའམ་རས་སམ་ཤིང་ཤུན་ལ་རྒྱལ་པོ་ལ་སོགས་པའི་གཟུགས་ནིམ་པའི་ཆུས་བྲིས་ལ་མཎྜལ་གྱི་སྟེང་དུ་ཁམ་པའི་ག་འུར་གཞུག་པར་བྱའོ། །​དེ་ནས་མཎྜལ་གྱི་སྟེང་དུ་གཞག་པར་བྱའོ། །​པོག་ཕོར་ལ་སོགས་པའི་མཆོད་པ་ཡང་བཤམ་པར་བྱའོ། །​དེ་ནས་བསམ་གཏན་བསྒོམ་པར་བྱ་སྟེ་ཡི་གེ་ཏྃ་ལས་བསྐྱེད་པའི་མྱུར་བའི་བརྩོན་འགྲུས་དང་ལྡན་པའི་ཡུམ་སྒྲོལ་མ་དཔའ་མོ་རྣལ་འབྱོར་མའི་ལུས་སུ་བསྒོམ་པ་ནི་པདྨ་རྒྱས་པ་ལས་བྱུང་ཞིང་ཉི་ཟླའི་སྟེང་ན་བཞུགས་པ་སྐུ་མདོག་ལྗང་གུ་ཀུན་ནས་གསལ་བ་གཞོན་ནུ་ལང་ཚོ་ལ་བབ་པ་ལྟ་བུའི་སྐུ་དོ་ཤལ་དང་དཔུང་རྒྱན་དང་རིན་པོ་ཆེའི་ཆུན་འཕྱང་ལ་སོགས་པས་མཛེས་པར་བརྒྱན་པ། པཉྩ་ལི་ཀའི་གོས་ཀྱིས་སྨད་དཀྲིས་པ་ཀ་ཤི་ཀའི་གོས་ཀྱིས་སྟོད་གཡོགས་པ་ཞབས་གཡས་བརྐྱང་བ་གཡོན་བསྐུམ་པས་བཞུགས་པ་ཞལ་གཅིག་ཕྱག་གཉིས་པ་ཞལ་མཆེ་བ་གཙིགས་པ་སྤྱན་ནི་རབ་ཏུ་འབར་ཞིང་དབུ་སྐྲ་གྱེན་དུ་བརྫེས་པ་དབུའི་ཟླ་བའི་སྟེང་ན་ཨ་མི་ཏཱ་བྷ་དང་བཅས་པ་བསྐལ་པའི་མེ་དཔུང་ནང་ན་བཞུགས་པ་ཕྱག་



The English translation of this folio by 84000 Translating the words of the Buddha can be found at:
https://read.84000.co/translation/toh726.html?part=UT22084-094-003-587#UT22084-094-003-587