The Dhāraṇī “Essence of Immeasurable Longevity and Wisdom”

བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །​འདི་ནས་ནུབ་ཀྱི་ཕྱོགས་རོལ་ན། །​བདེ་བ་ཅན་གྱི་འཇིག་རྟེན་ཁམས། །​དེ་ན་རྫོགས་པའི་སངས་རྒྱས་བཞུགས། །​དེ་བཞིན་གཤེགས་པ་ཚེ་དཔག་མེད། །​སུ་ཞིག་དེ་ཡི་མཚན་བརྗོད་ན། །​དེ་ནི་དེ་རུ་སྐྱེ་བར་འགྱུར། །​འཆི་བའི་དུས་སུ་སྟོན་པ་ནི། །དགེ་སློང་དགེ་འདུན་བཅས་ཏེ་མཐོང་། །​དེ་ན་བུད་མེད་ཡོད་མ་ཡིན། །​མངལ་ན་གནས་པ་ཡོད་མ་ཡིན། །​རིན་ཆེན་རྣམས་ཀྱི་པདྨོ་ལས། །​རྫུ་འཕྲུལ་ཆེན་པོ་འབྱུང་བར་འགྱུར། །​ཟས་དང་གོས་དང་སྨན་རྣམས་དང་། །​ཆོས་གོས་མལ་ཆ་ལྷུང་བཟེད་རྣམས། །​སེམས་ཀྱིས་བསམ་མ་ཐག་ཏུ་ནི། །​དེ་དག་མོད་ལས་འབྱུང་བར་འགྱུར། །​ཕྱོགས་བཅུར་བཞུགས་པའི་སངས་རྒྱས་རྣམས། །​བདེ་བ་ཅན་གྱི་བསྔགས་པ་བརྗོད། །​དེ་ལྟར་སངས་རྒྱས་བསམ་མི་ཁྱབ། །​སངས་རྒྱས་ཆོས་ཀྱང་བསམ་མི་ཁྱབ། །​འཕགས་པའི་དགེ་འདུན་བསམ་མི་ཁྱབ། །​བསམ་མི་ཁྱབ་ལ་དད་བྱས་ན། །​རྣམ་པར་སྨིན་པ་བསམ་མི་ཁྱབ། །​རྣམ་དག་ཞིང་དུ་སྐྱེ་བར་འགྱུར། །​དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་ཕོ་བྲང་འཁོར་དང་བཅས་པ་ཞེས་བྱ་བ་རྒྱར་དཔག་ཚད་ཁྲི་ཡོད་པ་ཞིག་ཡོད་དེ། རྒྱལ་རིགས་སུ་སྐྱེས་སོ། །དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་ཡབ་ནི་འཁོར་ལོས་སྒྱུར་བའི་རྒྱལ་པོ་བཟང་པོའི་མཆོག་ཅེས་བྱ་བར་གྱུར་ཏོ། །​དེའི་ཡུམ་ནི་གཟི་བརྗིད་ཅན་ཞེས་བྱ་བར་གྱུར་ཏོ། །​དེའི་བཙུན་མོ་རྒྱལ་རིགས་བཟང་སྐྱོང་མ་ཞེས་བྱ་བར་གྱུར་ཏོ། །དགེ་སློང་དག་དེ་བཞིན་གཤེགས་པ་ཚེ་དཔག་མེད་ཀྱི་སྲས་ནི་ཟླ་བའི་འོད་ཅེས་བྱ་བར་གྱུར་ཏོ། །​རིམ་གྲོ་བ་ནི་སྙན་པ་དྲི་མ་མེད་ཅེས་བྱ་བར་གྱུར་ཏོ། །​དགེ་སློང་དག་དེ་བཞིན་གཤེགས་པ་ཚེ་དཔག་མེད་ཀྱི་ཤེས་རབ་ཅན་གྱི་མཆོག་ཏུ་གྱུར་པ་ནི་བཟང་པོའི་ཏོག་ཅེས་བྱ་བར་གྱུར་ཏོ། །​རྫུ་འཕྲུལ་དང་ལྡན་པའི་མཆོག་དང་། །​བརྩོན་འགྲུས་ཆེན་པོ་དང་ལྡན་པའི་མཆོག་ནི་བཀོད་པ་ཆེན་པོ་ཞེས་བྱའོ། །​དགེ་སློང་དག་དེ་བཞིན་གཤེགས་པ་ཚེ་དཔག་མེད་ཀྱི་བདུད་ནི་མཆོད་པའི་རྒྱལ་པོ་ཞེས་བྱ་བར་གྱུར་ཏོ། །​ལྷས་བྱིན་གྱི་མིང་ནི་དང་བ་ཞེས་བྱ་བར་གྱུར་ཏོ། །​དགེ་སློང་དག་དེ་བཞིན་གཤེགས་པ་ཚེ་དཔག་མེད་ཀྱི་ཉན་ཐོས་འདུས་པ་ཆེན་པོ་ནི་ཉན་ཐོས་ཆེན་པོ་དྲུག་ཁྲི་ཡོད་དོ།