Degé Kangyur volume 91, F.222.b

།།འཕགས་པ་ཚེ་དང་ཡེ་ཤེས་དཔག་ཏུ་མེད་པའི་སྙིང་པོ་ཞེས་བྱ་བའི་གཟུངས་རྫོགས་སོ།​། །​།རྒྱ་གར་གྱི་མཁན་པོ་བུ་ཎྱ་སཾ་བྷ་ཝ་དང་། ལོཙྪ་བ་པ་ཚབ་ཉི་མ་གྲགས་ཀྱིས་བསྒྱུར་བའོ།​། ༄༅༅། །​རྒྱ་གར་སྐད་དུ། བྷ་ག་བཱ་ན་ཨ་མི་ཏཱ་བྷ་དྷཱ་ར་ཎཱི་མནྟྲ། བོད་སྐད་དུ། བཅོམ་ལྡན་འདས་སྣང་བ་མཐའ་ཡས་ཀྱི་གཟུངས་སྔགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །​ཏདྱ་ཐཱ། ཨ་མི་ཏེ། ཨ་མི་ཏོདྦྷ་བེ། ཨ་མི་ཏ་སཾ་བྷ་བེ། ཨ་མི་ཏ་བི་ཀྲཱནྟ་ཀཱ་རེ། ཨ་མི་ཏ་ག་ག་ན་ཀཱིརྟི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། གཟུངས་འདིའི་ཡོན་ཏན་ནི་བསྐལ་པ་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་ཡང་འདི་ལན་གསུམ་བཟླས་བརྗོད་བྱས་ན་སྒྲིབ་པ་དེ་རྣམས་ཟད་པར་འགྱུར་རོ། །​ལན་ཉི་ཤུ་རྩ་གཅིག་བཟླས་ན་རྩ་བ་བཞིའི་ལྟུང་བའང་ཡོངས་སུ་བྱང་བར་གྱུར་ཏེ། སངས་རྒྱས་སྟོང་ལ་དགེ་བའི་རྩ་བ་བསྐྲུན་པར་འགྱུར་རོ། །​བཅོམ་ལྡན་འདས་སྣང་བ་མཐའ་ཡས་རྗེས་སུ་དྲན་པར་བྱའོ། །​སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​ན་མོ་རཏྣ་ཏྲ་ཡཱ་ཡ། མ་ཧཱི་དུ་ཧི་ཀེ་སྭཱ་ཧཱ། ལུས་ལ་ནད་བྱུང་བ་དང་། ནད་ཁོང་སྐམས་སུ་གྱུར་ཀྱང་རུང་སྟེ། ལན་ཉི་ཤུ་རྩ་གཅིག་བསྔགས་ཏེ། བསིལ་ཡབ་ཀྱིས་དེ་ལ་གཡབས་ན་ནད་མེད་པར་འགྱུར་རོ། །​གཟུངས་སྔགས་དེ་གསུངས་མ་ཐག་ཏུ་འཁོར་ཐམས་ཅད་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།​། །​།བཅོམ་ལྡན་འདས་སྣང་བ་མཐའ་ཡས་ཀྱི་གཟུངས་རྫོགས་སོ།​། ༄༅། །​བཅོམ་ལྡན་འདས་སྣང་བ་མཐའ་ཡས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །​ཏདྱ་ཐཱ། ཨ་མི་ཏེ། ཨ་མི་ཏོདྦྷ་བེ། ཨ་མི་ཏ་སཾ་བྷ་བེ་ཨ་མི་ཏ་བི་ཀྲཱནྟ་གཱ་མི་ནཱི། ག་ག་ན་ཀཱིརྟི་ཀ་རེ། སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། གཟུངས་འདིའི་ཡོན་ཏན་ནི་བསྐལ་པ་བརྒྱ་སྟོང་དུ་བསགས་པའི་ལས་ཀྱི་སྒྲིབ་པའང་ལན་གསུམ་བཟླས་པ་བྱས་ན་དེ་རྣམས་ཟད་པར་རིག་པར་བྱའོ། །​ཉི་ཤུ་རྩ་གཅིག་ཏུ་བཟླས་པ་བྱས་ན། རྩ་བ་བཞིའི་ལྟུང་བའང་སྡིག་པ་ཡོངས་སུ་བྱང་བར་འགྱུར་ཏེ། སངས་རྒྱས་སྟོང་ལ་དགེ་བའི་རྩ་བ་བསྐྲུན་པར་ཡང་འགྱུར་རོ།



The English translation of this folio by 84000 - Translating the words of the Buddha can be found at:
https://read.84000.co/translation/toh676.html?part=UT22084-091-074-121#UT22084-091-074-121