སྟོབས་དང་ལྡན་པར་འགྲུབ་ཅིང་དེ་ཐམས་ཅད་ཀྱིས་མཆོད་པའི་འོས་སུ་འགྱུར་རོ། །ཚེ་སྟོང་ཕྲག་གཅིག་འཕེལ་བ་ནི་ཁྲི་ཚོ་གཅིག་བཟླས་པས་གྲུབ་པ་ཐོབ་པར་འགྱུར་རོ། །མཚམས་མེད་པ་རྣམ་པ་ལྔ་བྱས་ཀྱང་བྱེ་བ་ཕྲག་གཅིག་བཟླས་ན་འགྲུབ་པར་འགྱུར་བ་ནི་ངེས་པར་ཡང་དག་པར་རྣམ་པར་སྣང་མཛད་ཀྱིས་གསུངས་པའོ། །མི་མཐོང་བ་དང་། མིག་སྨན་དང་། མཆིལ་ལྷམ་དང་། རལ་གྲི་དང་། རིལ་བུ་དང་། གི་ཝང་དང་། མཁའ་སྤྱོད་དང་། དབང་དང་། དགུག་པ་དང་། བསྐྲད་པ་དང་། གསད་པ་དང་། དབྱེ་བ་དང་། རེངས་པ་དང་། རྨོངས་པར་བྱ་བ་དང་། བཅིང་བ་དང་། མནན་པ་དང་། ཕུར་བུས་གདབ་པ་དང་། གནོད་སྦྱིན་མོ་དགུག་པ་དང་། མཁའ་འགྲོ་མ་ཚར་གཅད་པ་དང་། རིམས་དང་། ནད་དང་། དུག་དང་། རིམས་ཉིན་བཞི་པ་ལ་སོགས་པ་མེད་པར་བྱ་བ་དང་། དབབ་པ་དང་། ལྷ་དགུག་པ་དང་། གཏེར་སྟོར་བ་རྙེད་པར་བྱ་བ་དང་། ངོ་མཚར་བ་མང་བ་ནི་འདིས་བྱེད་དེ། སྔགས་ཀྱི་རྒྱལ་པོ་བསྐུལ་ཞིང་འོད་ཟེར་ཅན་གྱི་ང་རྒྱལ་ལ་ཡང་དག་པར་ལྡན་པས་རྟག་ཏུ་སྔགས་བཟླ་བར་བྱའོ། །དེ་ནས་དབང་དང་དགུག་པའི་ཆོ་ག་ཡིན་ཏེ། སྟེང་གཡོགས་ཡོད་པའི་ཕྱོགས་སུ་ཙནྡན་དཀར་པོས་དཀྱིལ་འཁོར་བྱུགས་པའམ། ཡང་ན་ལྕི་བས་བྱས་ཏེ་སྐུ་གཟུགས་ཀྱི་མདུན་དུ་བྱའོ། །མྱ་ངན་མེད་ཀྱི་མེ་ཏོག་གི་ཁུ་བ་དང་། རྒྱ་སྐྱེགས་དང་། ཙནྡན་དམར་པོ་དང་། གིའུ་ཝང་ལ་གཟུགས་བརྙན་མངོན་པར་བྲིས་ཏེ་སྙིང་གར་སྔགས་དང་སྤེལ་བའི་མིང་བྱས་ལ་དེའི་ཆོས་འབྱུང་དུ་གཡོན་པའི་ལག་པ་བཞག་སྟེ་རྐང་པར་ལྷུང་ཞིང་སྣ་ཚོགས་པས་མྱོས་ཏེ་ཤིན་ཏུ་ཆགས་པས་སྐྲ་གྲོལ་བ་འདར་བཞིན་པ་བསམས་ལ་སྔགས་བཟླའོ། །མིང་གཟུང་བའི་སྦྱོར་བས་ཡིད་ལ་འདོད་པ་ཞག་གསུམ་གྱིས་ངེས་པར་དབང་དུ་བྱེད་དོ། །དེ་ནས་གཞན་ཡང་སྦྱོར་བ་ནི་ཆུ་ཀླུང་གི་ངོགས་གཉིས་ཀྱི་ས་འམ། རྐང་རྗེས་ཀྱི་རྡུལ་དང་ལྡན་པས་གཟུགས་བརྙན་བྱས་ལ། སྔོན་དུ་བསྟན་པའི་རྫས་དེ་ཉིད་ཀྱིས་གྲོ་ག་འམ། དུར་ཁྲོད་ཀྱི་རས་ལ་སྔགས་དང་སྤེལ་བའི་མིང་བྲིས་ཏེ་སྙིང་གར་བཅུག་ལ། དེ་ནི་སྐར་མ་རྒྱལ་ལ་བྱའོ། །སོར་བརྒྱད་པའི་མྱ་ངན་མེད་པའི་ཕུར་བུས་སྐྱེ་གནས་ཕུག་ལ་ཕུར་བུ་དེ་གཡོན་པའི་ལག་པར་བཞག་སྟེ་མིང་བཟུང་བས་སྔགས་བཟླས་པ་བྱའོ།